Dem Hochwirdigenn inn Gott Herrnn, / her[rnn] ⌊Iohanni von Gotts genaden des loblich[en] stiffts zcu ⌊Ermelandt⌋ bisschove⌋ [etc.], unnserm genedigen herrenn
Hochwirdiger in Gott Genediger Herre. /
Unser gantzwyllige und gefollige dienste seinst Ewer Hochwirdigen [G]]naden in besundern fleÿsigen andacht stetz entpholenn. /
Genediger Herr.
Wir haben itzt bey lawffenden thage / Ewer Hochwirdigen Gnaden ⌊⌋ ⌊Hanns Hen[n]emans⌋ leib eigenthummb betreffen / entfangen / und vornommen. / Wir h[a]tten auch Ewer Hochwirdigen Gnaden biszheer umbeandtwortt nicht gelossen, / do ehr einhei[m]isch gewesen / unnd wir seine gelegenheit / ausz ihme hetten vornehmen mogenn. / Als ehr aber an heymen gelanget, / haben wir denselbigenn ge[f]urdert / unnd ihme Ewer Gnaden ⌊⌋ furgehalten / und zcu letzt befundenn, / [d]as ehr von hochloblicher gedechtnisse, / ethwan der ehrwirdigen in Gott herrn[n] ⌊Mauritio⌋, Ewer Hochwirdigen Gnaden furfarn, / unnd seiner Gnaden kamerampt furw...er etc. losz unnd freÿ gelossenn unnd gegebenn. / Wie Ewer Hochwirdigen Gnade auss eingelegter copei / derselbigen befreÿung und sunst bemelten Han[n]sen / supplication unnd bethschrifftenn hirinne vorwaret, / noch der lei...ne / in gnaden werden habenn zcuvornehmen. /
Dieweyle denne gnugs[a]m befunden, / das ehr / der bemelte ⌊Hanns⌋ / freÿ / unnd nicht mehr leib e[i]genn ist. / Wolt es sich immers geburett haben, / das die fursichtigenn von ⌊Wormenith⌋ / sich des beruffes nicht gewegert hetten. Dan es wyll unns widder die vielmols auffgerichte vortrege etc. zcu thun nicht geborenn. / Dienstlich bittende / dieselbigen von ⌊Wormenith⌋ Ewer Hochwirdigen Gnaden underthane / dohin zcu richtenn / sich solcher tadt hinfort zcu mesigen / und den gemeinen vortregenn / und gemachten statuten ebentrechtigk zcu leben. / Domith sich nÿmanndt ethwan eines furfencklichen besweres / zcubeklagen habe. /
Ein solchs ummb Ewer Hochwirdigen Gnade (die wir Gothe lange gesundt seligklichen thuen entphelen) zcu beschuldenn wollen wir gantzgeneigt befunden werden.
