Dem Ernwirdigsten in Goth Hernn, hernn Ioanni von Gots gnaden bisschove zu Culmenn und administrator des stiffts Pomeszanien etc., unnszerm gnedigen herrnn

Ernwirdigster in Goth, gnediger herre. /

Unnszer guttwillige und behegliche dienste szeyn Ewer Gnaden allewege bevoran entpholen.

Gnediger herre. /

Es seynt uns in dato / diesze beygebundene brieve / an Ewer Gnade lawtende (die von Lunenburg ken Lubeck gekommen / und von dannen hieher an unszern secretarium uberschryben und geschicket) uberreicht werden, welche wie hienebenn an Ewer Gnade auffs furderlichste thuen vorfertigen mith an g...ster dienstlichen bitt, who ichtes dorinne das uns zuwissen vonn rathen ader sunst uns ane jemander nochteill ader hynder angezeigt werden muchte / enthaltenn uns dasselbig von Ewer Gnade umbesi[c]herlich mitegetheylet werden muchte.

Das wolten wir ummb Ewer Gnade (der wir sunst zu die[n]stlichem wolgefallen gerne lebben) gerne widderummbe vordiennen und hiemit dieselbige Gote / lange gesunth und in glugszeligem / stande befehlen.

Datum zu Dantzigk, montags am tage Sanctae Luciae im jore etc. XXXV.

Ewer Gnaden dienstwillige burgermeister und rathmann der statt Dantzigk