Dem Hochwirdigen Fursten / unnd Herrnn, / herren Johann bischoven zu Culmenn / unnd administrator des bistumbs Pomezan, / meinem gnedigen herrenn /

Hochwirdiger Furst, / gnediger herr. /

Ewrn Furstlichn Gnaden seyen mein guetwillig dienst allzeit zuvoran berait. /

Ewr Furstlich Gnaden schreiben mir yetzo getan des datum stet zu Labaw den vierten tag Ianuarii / hab ich empfangen / unnd daraus vernomen, / das Euer Furstlich Gnaden die dreuhundert(!) ducaten oder den wert, / meinem diener Jorgen Muelich zu Thorn zu erlegen verordnet, / der zuversicht, er werde die also emphanngen haben. / Des bedannckens ist gegen mir nit von notten, / dann ich Euer Furstlich Gnaden weitter gedient hab, / unnd warinn ich Euer Furstlich Gnaden weitter gediehen kan, / bin ich zuthuen / noch erputtig / unnd genaigt. /

Mein gnediger herr / marggraf Johann Albrecht zu Brandenburg stathalter etc. ist vor acht tagen zu Augspurg, / daselbst ich bey seinen furstlich gnaden geweset, / die ist auf dem zug hinein zu kayserlichen maiestät gen Neaplas, / oder Rom, / daselbst ir maiestät yetzo sein wirdet. / Deshalben ich Ewren Furstlich Gnaden brief, / seinen furstlich gnaden an kayserlichen majestät hof hinein schickh. / Das wolt ich Euer Furstlich Gnaden dienstlicher meinung nit verhalten. /

Thue mich hiemit Ewrn Furstlich Gnaden undertheniglich bevelchen. /

Datum Schmichen, / am XXI tag Februarii / anno etc. XXXVI.

Ewr Gnaden gutwilliger Antoni Fugger subscripsit