Sigismundus Dei gratia rex Poloniae, magnus dux Lithuaniae, Russiae, Prussiae, Masoviae etc. dominus et heres

Serenissimis fratribus et consanguineis nostris carissimis regibus ac illustrissimis et illustribus principibus, ducibus, comitibus, baronibus, gubernatoribus, locumtenentibus, capitaneis, castellanis, burgi et civium magistris, communitatibus, ancianis, gabellariis, datiariis et quorumvis locorum praesidibus, classiumque et quarumcumque navium praefectis, ac passuum, portuum et viarum custodibus, ceterisque, ad quos praesentes litterae nostrae pervenerint, amicis nostris carissimis salutem et omnem bonum, subditis vero nostris gratiam nostram regiam.

Cum magnificus Ioannes Dantiscus, orator noster, ex Hispaniis a sacra caesarea maiestate, fratre et consanguineo nostro carissimo, ad nos revertatur cupiamusque ex animo illud iter securum ubique reperire, ipsum Vestris Dominationibus diligenter comme[n]damus postulantes ab eis, ut eundem Ioannem Dantiscum terra et mari proficiscentem una cum eius comitat[u], equis, rebus et sarcinis per loca, terras et dominia illis subiecta libere sine quovis impedimento et molestatione reali [et] personali ac datii, pontivegii, gabellae et cuiusvis alterius exactionis solutione ad nos redire, transire in civitatib[us]que oppidis et aliis locis in ditione ipsarum Vestrarum Dominationibus consistentibus subsistere, morari, quam diu illi visum fuerit et rerum necessitas exposcerit, permittant ac eum affectum, benivolentiam et favorem, quem eius virilis condicioque meretur, eidem exhibendo illum hospitiis excipi humaniterque tractari ac ubi necessarium et expe[di]ens fuerit, illi salvo et securo conductu et transitu provideri faciant.

Parati autem sumus nos quoque Vestris Dominationibus ac earum subditis pari vicissitudine in similibus et maioribus rebus, ubi occasio se obtulerit, compla[c]ere.

Subditi vero nostri praemissa omnia facere et exsequi teneantur pro gratia nostra.

Harum quibus sigillum nostrum est impressum testimonio litterarum.

Datum in civitate nostra Radomiensi, prima die Martii anno Domini millesimo quingentesimo vigesimo octavo, regni vero nostri anno vigesimo secundo.

Ad mandatum regiae maiestatis proprium Petrus episcopus Cracoviensis et vicecancellarius suprascripsit