Domino Ioanni Dei gratia episcopo Vladislaviensi

Reverendissime in Christo Pater et Domine, frater et amice carissime ac honorande.

Non dubium apud me fuit, quin haec controversia, quae Dominationi Vestrae Reverendissimae cum reverendissimo domino archiepiscopo Gneznensi intercessit de aequo et bono, omisso iuris strepitu, terminari debeat, tamen hanc opinionem meam plurimum confirmarunt litterae ipsius domini archiepiscopi et Dominationis Vestrae Reverendissimae ferme uno tempore mihi redditae, ex quihus perspexi iacta esse fundamenta et initium occasioni datum, ut amice de omnibus inter illas transigatur, quae res profecto fuisse(!) ... mihi auditu gratissima. Nam futurum inde spero, quod, si non prius, saltem synodi provincialis tempore totius causae controversia ad bonum finem reducetur.

In negotio religionis litteras scribi mandavit ad magistratum Gedanensem maiestas regia, quibus illis mandat et committit, ut diligenter et cum summa vigilantia haeresis novae conta­gionem prohibeant et veterem reverenter servent et tueantur.

Thurcorum copiae ingentes et apparatu bellico instructae non procul iam a finibus Austriae castra habere dicuntur, contra quas caesar cum rege Romanorum et aliis principibus Christianis magnum numerum militum se missuros pollicentur. Quorum tamen nullam partem hactenus coactam esse ex reverendo domino Ioanne Dantisco, episcopo Culmensi, qui hodie huc salvus applicuit, intellexi. Cum tamen aliquid certi de rebus illis huc afferetur, ego ad Dominationem Vestram Reverendissimam perscribere non negligam.

Cuius me amori et benevolentiae fraternae ex animo commendo et felicissimam in longa et bona vale­tudine semper esse desidero.

Datae