Dem Durchlauchtigen Hochgebornen Fursten und herren, herren Albrechten hertzogen zu Meckelburg fursten tzu Wenden Graffen zu Schwerin, Rostock und Stargarten etc. der land herren. Vnserm vilgunstigen hern vnnd Freunde.

Unser freuntschafft und alle seligheit zuvoran, durchlauchter hochgeborner furst, vilgunstiger her vnnd freundt.

Es hat uns dieser unser underthan und lieber getreuer Asmus von der Dyelen, Euer furstlicher lieb diener, derselben Euer Lieb schreiben geantwort, dem wir zu seinem vfferlegten wege Euer Lieb zu wolgefallen gerne sein forderlich gewest, wie er dan weitleuftiger wirt anzeigen. Von dem wir auch gerne haben vornommen Euer Lieb gluckselige wolfart und gesuntheit, die wir zu langer zeit in der gnad Gots aus sonderer freuntlicheit, die wir zu Euer Lieb gonnen und wunschen, mit erbietung wo wir freuntlich Euer Lieb gefallen zuthun und wilferig zusein wusten, das wir des gentzlich sein geflissen. Es hat uns auch gemelter unser underthan Euer Lieb diener bericht, das diese zeit villeicht Euer Lieb sich in den Reichstag gen Regensburg soldt begeben haben. So dis unser schreiben Euer Lieb in der stelle zukombt, ist unser freuntlich bitt, / dieweil wir auch von wegen unsers bischthumbs under des reychs fursten gesetzt, wolt unser im besten vor unsern gunstigen herren und freunden nicht vorgessen / etc. Weiter uf Euer Lieb schreiben wirt dieser Euer Lieb diener unsere freuntliche meynung anzeigen, / dem wir bitten ein gnediger her woldt sein, das wir in einem vil grossern vmb Euer Lieb / der / alten gunst und freuntschafft wir uns befehlen vnbeschwert wollen beschulden.

Datum aus unserm schlos Heilsberg, den xxvii tag Aprilis MDXLI

Joannes von Gots gnaden Bischoff zu Ermelandt

Joannes Dantiscus Episcopus Varmiensis manu propria scripsit

Dem erwirdigenn in Goth Furstenn, / unserm besondernn liebenn freundt, hernn Johansenn Dandisco, bischoffen zcu Ermelandth

Unser freuntlich dienst unnd was wir mher liebes und guts vormugen zcuvor.

Erwirdiger in Goth / Furst, besunder lieber freundt. /

Es hat uns der erbar unser hoffmeister radt unnd lieber getrewer Uldrich Iglingen mit underthenigen bitten / angelangt / ihme vor die seynenn eyn freuntlich geschriefft / unnd furbit an Euer Lieb genediglich mit zcutheilenn, / dann er von Euer Lieb und sunderlich auff nechst gehaltenem reichstage zcu Augspurgck ein gunstigen guthen willen so dyeselbe Euer Lieb zcu ime getragenn / gespurt / unnd sich noch aller genadenn vonn Ewer Lieb ihme und den seynen zcu beweisen vortroste / und nachdem dann Ewer Lieb seyner gelegenhait / unnd das er beÿ dem seynen / und seynem weÿb und kindern nit sicher sein kann / wissenschafft haben und villicht dye seynen von etlichen also in seynem abwesen / beschwert und molestirt werdenn, / das Euer Lieb dieselbigenn seyn weyb unnd kinder in genedigem befhelich wollen haben unnd in ehrlichenn billichenn sachenn uber dieselben haltenn auch kegen denjenigen von denen sie beschwert ader turbirt verbitten und beschutzenn etc.

Unnd dyeweil wir dann bemelten unsers hoffmeÿsters zcimliche bit angesehen unnd die seynen umb der getrewenn dienst willenn so genanter Iglinger uns ertzeigt unnd hinfurthan beweisen will / gern gefordert sehenn. So gelangt an Euer Lieb unser gantz freuntlich bitt Euer Lieb wollen umb unsert willen in allen erlichen billichen sachen vorgemelten unsers hoffmeysters weyb unnd kinder befholen sein lassenn / sie vorbitten / und genedige guthe furderunge und schutz ertzeigen und beweisen, / das wollen wir umb dyeselbe Euer Lieb freuntlich vordienen und in gleichem fhall erwiddern.

Datum Schwerin, montags nach Exaudi anno etc. XLI-o.

Von Gots genaden Albrecht hertzogk zcu Meckelnburgk, furst zcu Wenden, grave zu Schwerin, Rostock unnd Stargart der lande herre manu propria subscripsit

Dem Erwirdigenn inn Goth unnserm besunderenn geliebthenn Freunde, / herrnn Johannes bischoff zu Ermelandth /

Unnser freunthschafft zuvorn.

Erwirdiger in Gott besunder geliebter Freundt. /

Wir habenn Ewer Liebe schreibenn / bei jegenwirtigem Albrecht vonn Iglingenn enthpfangenn unnd haben in warheit Ewer Liebe glucklichenn zustandt unnd wolffardt inn sunderheit, das Ewer Liebe, / auss guthertziger wolmeynunge unnser alte freuntliche kunthschafft / durch schriefftenn zu besuchenn / nicht habenn unttherlassenn konnen, / hertzlich gerne gehort / unnd vernohmenn. / Tun unns auch desselben gar hochliches unnd freuntlichs vleiss bedanckenn. / Wenn sichs nun dermassenn / so tzutragenn unnd begebenn wolte, / das wir unnser alte freunthschafft unnd kunthschafft widderumb vernewenn mochtenn, / werenn wir sulchs hertzlich begerick unnd geneigt. Was auch allenthalbenn / vor newe tzeitunge alhier inn Deusch landen vorlaufftigk haben wir genantem Abrecht vonn Iglingenn / Ewer Lieb zuberichtenn aufferlegt wie Ewer Liebe vonn ime ferner vornehmen werdenn / und wunnschenn / Ewer Lieb, / hin widderumb der wir unns in Ewer Lieb alten kuntthschafft unnd freunthschafft thun bevehlenn viel gluckseliger zeit.

Datum Schwereyn, Fhreitag nach Corporis Christi anno etc. XLII-o.

Von Gots gnaden Albrecht hertzog zu Meckelnburgk, fursten zu Wendenn, grave zu Schwerein, Rostock unnd Stergart der lande herrnn /