Unsere gunst zuvorn. Liber ohem Simon.

Hab fleis, das du, alle dinge dir von uns befholen wol ausgericht, / mit den ersten wider kommest. / Und besich indert ummb kleine guldene rinchen, nicht hoher dan zu gulden, / wie du wist, / wir zu Brussel hetten / und der ein oder vier / jungfern, die in die ehe sich begebenn, zuvorschencken / etc. Es wirt unsers vetternn Lorenczs von Houen diner dich berichten, / wie sein sachen sthen, / hiruff wir dir befhelenn, / das du den edlen und nhamhafftigen heren Hansen von Werden etc. in unsermm nhamenn besuchest und im unsernn freuntlichen grues sagest, / bittend so vil im muglich, / unsers vetternn sachenn wold bey eym ersamenn rothe ein gutter furdrer seynnn, / und das unser diner von Peterkou noch nicht komenn ist. / So bald der kompt / wolle wir im schreibn, wie umb alles. / Grues den hern doctor und dein mutter mit demm gancznn geslecht. /

Datum uff unsermm slosse Lobau, den XXVII Ianuarii anno domini 1534

Unsernn gunstigen grues zuvorann. Erhafftiger, bsunder lieber frundt. /

Das jenige, das ir uns noch laut Ewrs schreiben[s] bey dissem boten gesand, / hab wir volkomenn entfangen, ouch im sein boten lon zcalen lossen. / Was ir habt ausgebenn, wirt Euch unser bruder Jorge, / den wir teglich von hynnen gen Danczk wollen abfertigen, / erlegen. / Wolt von solcher seiner zu kumfft unsermm altnn svoger Peternn Reisen, genent Likefeth, / und im pfarhove sagen. / Gothe befholen.

Datum etc. XII Aprilis M D XXXVII.

Joannes

Unser gnad zuvorann. Erbarr, liber ohem und getrewerr.

Wir habnn dissen tag vonn Caspernn, deinemm bruder, aus Rom brive erhalten, / datum den XX tag im Meien, / sein ouch brive an denn hern landprobst, / welchs du seiner wirde wirst ansagen, / hie her zu komenn solche briv[e] und anders, / das seiner wirde nicht misfallenn wirt zu entfangen. Es hot uns ouch Jorg Hegel geschriben, das wir im die LX ducaten zcalenn sollenn, / die du bey im gelossen host von unsermm gelde, / deinemm bruder gen Rom uber zu machenn, / derwegen macht dich her, das wir uns mit dir daraus mugen bereden. /

Datum aus unserm schlosse Heilsberg, den XXII Iulii MD XLIII.