Unsernn freuntlichnn grues mit erbittung alles guttenn zuvorann. / Edler, ehrnfester her, gunstiger freundt. /

So wir dissen unsernn diner an furstliche irbarkeitt schicken, / hab wir nicht mocht nochlossen, Ewer Herlichkeit mit dissem unsermm schreibnn zu besuchen, / die wir bitten zu vorhelffen, / das gedochter unser diner mit den erstnn muge abgefertigt werdenn. / Wir schicken ouch hiemit brive an unsernn svester man hern doctornn Johan Reynekenn, / so er noch indert in Liffland wer, / im die zu zuschickenn, doneben ouch den an dem houptmann zur Memmel. / Worinne wir widerummb Ewer Herlichkeit mugen vil liebs und fruntlichen willen erczegen, sey wir geneigt, Ewer Herlichkeit Gote dem almechtigen befelend.

Datum aus unsermm slosse Lobau, den XI Julii, anno Domini 1534.

Unsernn freuntlichnn grues und alles guttnn zuvorann. Edler, ernfester und hochgelerter her, / besonder liber freundt. /

Wir habenn Ewer Herlichkeit schreibenn nebenn denn II zugeschickten briven gestrigs tags von dissemm botenn erhaltenn. / Wer uns fast lieb gewest, das uns darbey furstlicher durchlaucht antwurt, dar uff wir wartenn, wer wordenn, do mit wir unsernn diner mochten an koniglichen hoff abzufertigenn. / Bitten derwegenn , die selbten furstlicher durchlaucht brive, / die Ewer Herlichkeit in der eil einzuslissenn vorgessenn, / mit demm erstenn uns wold lossen zu komenn, / do mit nicht vonn noten, unsernn boten weiter uff zu zcyhenn, / hie an uns Ewer Herlichkeit wirt grossen wolgefallenn thun in aller freuntlicheit zu beschuldenn. / Gote in sein gnad befolenn.

Datum aus unserm schlosse Heilsberg, den erstnn tag im Meyen MD XL.

Ioannes.

Wir woltnn gernn furstliche durchlaucht bittenn, ein ausgewachssnenn knabenn Falkenhain ... zu nemenn, den uns der durchlaucht, hochgeborn furst, herczog Fridrich zu Lignicz negst, do wir zu Breslau woren, hot mit gebenn, / so solchs uns furstliche durchlaucht nicht wold vorsagenn, / derhalbnn wolde sich Ewer Herlichkeit, wie darzu furstliche durchlaucht gesint, / erkundenn . Ouch bittnn wir, / so Ewer Herlichkeit was gewisses hot von koniglicher majestet von Krako, ab die sich noch Littenn begebenn ..., der mitwoch unsers ... ist zoges gen Marienburg uns mit demm erstn wissnn lossenn.

Dem edlen, ernfesten und hochgelarten hern Johan von Creitzen doctori etc. und furstlicher durchlaucht rath und cantzler, / unserm besondern, guten freunde

Unnsernn freuntlichenn grus unnd alles gutten zuvoran. / Edler, ernfester unnd hochgelarter her, besonnder gutter freunt.

Dieweil wir bericht sein, / das Yr mit Euerm collega uff denn reichstag genn Peterkaw von furstlicher durchlaucht, unnserm hochgunstigen, liebenn hern unnd freunde, / seit abgefertiget, / unnd uns dieser loffender bothe vonn Krako an unns [g]eschickt / ist zukomenn, / hab wir nicht mugen noch[la]ssennn, / etzlichenn unnsern gutten hern unnd freunden, / alse nemlich / denn hochwirdigistenn hern ertzbischoffe zw Gnisen / unnd dem hern bischoffe inn der Coye, / do bey auch denn edlenn, wolgebornnen hern Johan gravenn zw Tarnaw, krokischenn castellan unnd des reichs obersten heuptman, / hern Petro zw Wissnicze graven, / krokischenn weywoden und des reichs oberstenn marschalke, / auch hern Andres zw Gorka, / graven, posnischen castellan, / iren lieben allenn einer meinung, / wie eingelegte copei inhelt, / zuschreibenn, / wie wir etwan mit Euch, / do Yr im negstenn bey unns gewesen, / verlossen. / Unnd woltenn gern, das die vorgenomne sache zw guttem und begertem ende mocht iren ausgang gewynnen, welchs wir Euch nebenn Euern collegn freuntlicher weiss nicht haben mugenn vorhaltenn. /

Dathum aus unserm schloss Heilspergk, den XVII Marci M D XLIIten.

Iohanness, [v]on Gottes genaden bishoff zw Ermelandt