Accepi

Unserenn(n) etc.

Wie mitleidlich wir zuvor den abgang Ewer in Got vorstorbenenn hausfrauenn gehort ...b ist uns ... gewesen, so durch Ewer schreibenn zu erfharenn, / das Ihr ... der aufs new ...iest und euch in den ehestand durch furderung furstlicher durchlaucht zugebenn bedocht, / und die zum ehegathen nemet, / darzu ouch furstliche durchlaucht gerathenn. / Wunschenn euch derwegenn zu solchenn heiligenn und gotlichenn werck viel gelucks und heils von Got dem almechtigen, / der seinem segen geben wolle, / damit solcher standt euch und Ewer braut / zur seligkeit gelangett und gereiche. / Hetten auch gerne personlich ader durch unseren abgefertigten anwaldenn, / dieweil Ihr uns darzu so freuntlich und dinstlich geladen, / Ewer ehefreude besucht, / wo wir nicht durch koninglicher majestet, unsers allergnedigsten hern geschefte, / so uns nebenn dem hern Pomerelischenn woiwoden auferlegt, / und deshalben ein tag leistung in der zeit und / tage Ewer ehefreuden halten mussenn, gehinderth wurdenn, / das wir auch als dan nicht den edlen und ernvhesten unsern lieben bruder und getreuen Berndt von Houenn, heuptman auf Heilsberg, den wir zu bowarung unsers hauses hinder uns lassenn, / entberen und dahin abfertigen , ader unser suester Vrsula mit ihrer tochter ... ihn euch zun ehren zihen lassen kunnen. / Damit wir aber euch und Ewer braut unseren freuntlichen und genegten willen, / den wir zu beider person tragen, / erzeigenn, / schicken wir hieneben dersulbtenn Ewer braut , die Ihr von unsernt wegen freuntlich wollet grussen und viel glucks wunschenn, / ein kleines geschencke zur brautgabe, / nemlich ein ringlin, / das sie also neben euch von uns vor gut dismol wirdt annemen / und sich hernacher alles guttenn / / und zugethanen willens zu uns vorshenn, / damit wir Ewer person und sie idere zeit zufurderenn nicht werden absthen. / Gotlichen genaden beuolenn. /

Datum Heilsberg XXVI Ianuarii 1547.

Georgio Mandt

Unsernn etc.

Wir habenn czweimal / auf ewer gescheues bittenn v... schreibenn, so ihr an uns gethann, / wegenn des mandats widde[r] Hansenn Glosow an koninglichenn hof geschribenn, / nichts aber bisher / aus den ursachenn, / das man meint, solchs dem koninglichen geleidt, welches gedochtem Glosow vorlien ist, widdrich zusein, erhaltenn konnenn, / wievol wir aufs fleisigste v... das aufzugeben gebotenn habenn. / Wollenn dennoch nicht nachlossenn, / bei dem grosmechtigen hern pomerelischenn wojwoden, / dieweil sein herlichkeit itz aufzihenn wirdt, / zu bofurderenn, / damit wir euch dergestalt ein mandat aufbringenn und das euch alsdan zun handenn schicken. / Wo aber solcher unser wolmeinung keinen vortgang gewunne, / musset ihr den willen vor die tadt aufnemen, / und andere wege und mittel, wie ihr zu ewer bezalung komen muge[n], suchenn. / Worin euch an unserer furderung nicht sol abghenn. / Gotlichen genaden bovelen.

Datum aus unserm schloss Heilsberg etc.

Datum 20 Februarii 1547.

Greger Schonwalt von Bisdorf aus Reselschen Cameramnpt ist freigebenn den 20 Februarii 1547.