Ioannes etc.

Unsernn gendeigen grues zuvoran. Edler, gestrenger, liber, getrewer. /

Die unsrenn vonn Braunsberg habnn uns geschribnn, wie etliche paurs kinder ire gutter zu schoffen vorgenomenn. / Dieweil das wider unsers lands ordnung ist, / befhel wir ... mit solchen zu handlenn, wie die saczung mit brengt, und solche gutter uff uns annemenn. / Hiemit schick... wir euch unser privilegium uber die begebunge euch von ... aus sondrenn gnadenn geschen / der zuvorsicht, / die selbt... in kein vorgessen werdet stellenn. Das ander sigel wirt unser wirdiges capitel anzeigen. Gote befolenn.

Datum Heilsberg XVII Fabruarii MD XXXIX.

Ioannes etc.

Unsern gnedigen grues zuvorann. / Edler, gestrenger, liber getrewer. /

Dissen briff an unsernn bruder, / so er noch zu Danczk ist, / werdet im mit den erstnn zu stellen. / So er aber under wegens wer, / so schickt in dennoch, das er an Macz Platen komme, / der ein euch ein halbnn stein pfeffer wirt sendenn, / welchenn so ir uberkompt ane seumen werdet her schickenn und ein gefelligen dienst thun. ... beygebunden ...ve schickt an ... Johans Zcy...man gen der ...wenburg und let... dernn widerummb ...wurt, / das schickt ouch her mit den erstnn.

Datum Heilsberg, VIII Iulii MDXXXIX.

Ioannes etc.

Proykenn

Unserenn etc.

Uns ist von dem ersamenn, unsermm libnn getrewenn Tewes Schissenteuber bericht vorkomenn, / das noch ausmessung der rogitschen gutterr, / wie wir euch negest befolen, / fumff morgen, wesen und acker durcheinander, in der se[e]grenczen hinderstellig ligenn, / von welchen uns die helffte zukumpt, / wie von dem andrenn, / das ausgemessen ist. / Derwegen wir euch befelenn / gruntlich zuerkundenn, / wie es derhalbenn ein gestalt hot un[d] ab sonst noch was were / der sachen zugehorig, / darinnen negst unser spruch ergangen, / das wir uns darnoch wusten zu haldenn. / Hiran geschicht unser gefellige meynung. /

Datum aus unserm slosse Heilsberg, den fumfte[n] tag Iulii M D XLI.

Ioannes etc.

Proyken

Unsern etc.

Wir bedorffen des wirdigen hern Fabian Em[erich] vicarien unser kirchen Frawenburg, / dem wir ouc[h] derwegen geschribenn, / das der hie bey uns muge sein den negsten donnerstag uff oder noch mittag, / hirumb w[ir] Euch befhelenn, / das ir gemelten altenn priester fuegli[cher] weis mit Ewrnn behangen wagen und pferden / mit allen kuemigheit seinemm alter gemess an uns last fur[dern]. Woran ir uns ein sondrenn gefallen dienst werd[et] thun in gnaden zu beschulden etc.

Wir haben dem u[n]cristlichen ubeltether aus dem Awhoue, / von dem XXII[II] tag dis monts bynnenn acht tage sich hie her vor uff gnad und ungenad zugestellenn, / unser gleit gebenn. So aber derselbte noch vorloffner zceit in unser herschaff[t] wurd gefunden, / habt fleis, das er gefenglich werd angenomenn und in dem unsers weiternn willen erwartet. / Darann geschicht unser genczliche maynung.

Datum aus unserm schlosse Heilsberg, XXVIII Iulii M D XLIII.

Proyken

Ioannes etc.

Unserenn etc.

Unser bothe, den wir zu Braunsberg negst an koniglichen hoff schickten, ist vorgestrigenn tage wider ann uns gekomenn bey demm uns koniglicher majestet / ewrenthalben und der pension, / die wir vor euch uff Marienburg gebeten, vortrostlich geantwurt, das ir majestet den hern hie im lande schaczmeisterr hab zu sich gefurdert, durch den / wil ir majestet unser vorbitt nochkomenn. / Derwegenn wir gutter hoffnung sein, / weil wir ouch gemeltem hern schaczmeister derhalbenn / vor seinemm auszcog (: wie ir im negsten von uns vorstandenn :) vor euch habenn geschribenn, / der zuvorsicht, werde sich hir inne gen uns wilferig beweisenn etc.

Wie es in Hungernn im abczoge des Turken / und bey Romischer kayserlicher majestet im zcoge in Francreich / ergangenn, / Paris belegert, / den turkischen konig biss gen Leon, / sein leczste houptstat an Sweicz stossend, / getribenn, / hab wir euch, / wie eim alten kriegmann, in beigelegten lateinischen zceitungen / nicht wollenn vorhaltenn, / die wirt euch der pfarrer gernn auslegenn. / Wan ir die gehort, / werdet ir sie unsermm official, hern Jorgen Donerr, / nebenn unsermm brive an in zuschicken etc. Es sol uns ouch ein huchsshoupt und ein tonne danczker getrenks von unsermm svagerr, hernn Jorgen Scheffken, an euch zukomenn, / das lost biss gen Wormenith wol vorwart / mit einemm, der gut acht daruff habe, / furenn und unsermm burgermeen do selbst befhelenn, / das ers dergleichenn mit den erstenn an uns losse bringenn. / Darann geschicht uns wolgefalner dienst. /

Datum aus unserm schlosse Heilsberg, den V Nouembris M D XLIII.

Ioannes etc.

Proyken

Unsernn etc.

Wir habnn euch negst etliche brive und zceitunge zugeschickt. / Ob die euch geworden sein, / habt ir uns bey ewremm jungen, der bey dem getrencke ist ankomenn, / nicht lossenn wissenn. / Hie mit thu wir abermals disse beigelegte an euch fertigenn / und befhelen, die mit zufelliger botschafft, / ob imant sich gem Elbing und vordan genn Danczk thet begebenn, / in denn stellenn zuuberantwurtenn, / daran uns gefelliger dinst geschieht. /

Datum aus unserm schlosse Heilsberg, demm XIII Nouembris M D XLIII.

Ioannes Proiken

Unsernn etc.

Hiemit losse wir euch wissen, / das wir den neg... zu kunfftigen mitwoch uber acht tage mit gotlicher hulff bey euch wollenn sein und ... andren tag uff den Elbing gen Marienburg uns zu beg[eben] , / darnoch ir euch werdet habnn zurichten. / ... goltsmide Thomas werdet ir sagen, / das er alles fertig haben ... wir im zu gissen befolenn etc. Dissen beigelegten briff werdet ir dem hern thumprobst lossenn gebnn und ant... von im furdren, / dasselbte mit den ertsten an uns schicken. Hiean geschicht uns sonder wolgefallnn.

Datum aus unserm schlosse Heilsberg, den XXIII Aprilis MD XLV.

Sales fere ad Vormitensem perfectum.

Proiken

Unsernn etc.

Disse brive werdet ir durch eignenn boten an den hern schaczmeister genn Marienberg lossen bringenn / und antwurt von im furdrenn. / Die unkost wirt euch unser scheffer erlegen, ouch anzceigen, welche [s]ich in der negsten most[e]rung nicht bewisenn. Hiran thut ir uns sondren wolgefallen.

Datum im zcoge noch Heilsberg, den XV Octobris MD XLV.

Unsernn etc.

Nicht wenig habenn wir uns vorwunderth ob der ersamen von Dantzig vorschreibung, / die sie unsere ... underthan deren form eine ihnen von wegenn des gefa... nebn czugebenn, / vorgestalt. / Auf das aber ihren willen darin von unsernn underthan zum teil ein genugenn geschege, / haben ... ihnen eine vorgeschribenn, / des lauts sie eine von sich geben mogenn. / Und uberschickenn euch hienebenn och eine copei, welcher form noch / Ihr neben der vorschreibung, so von unser stadt Braunsberg, / dene[n] von Dantzig sol uberreicht werdenn, / an diesulbte stadt Datzig schreibenn werdet, / und weiter wartenn, was euch hirauf czum antwordt von ihnen werdenn wirdt. Hierann geschicht von euch unser meinung ein genugenn.

Datum aus unserm schloss Heilsberg, den XXVIII Octobris 1545.

1545.

Unsernn genedigenn grus zuvorann. Edler, gestrenger, lieber getreuer.

Was ihr an uns wegen der ferlichen czeiten / und daruber gehabten vorsorge mit unserm lieben, getreuen einem ersamen radt unser stadt Braunsberg gelangt, / ist uns fast angenem gewesenn / und thun ihn dem eweren fleis lobenn. Vor unsre person aber wissen wir noch nicht, / das erkein ferlickeit / uns schadhaftig vorhanden were. / Hoffen auch nicht, / wo ihr etzwas geschen und sich erheben solte, / das solchs vor dem reichstag, so kaiserliche majestet kurtzlich im Reich Deutscher Nation halten wirdt, / erkeinenn vorgang gewinnen konne. Ess hat auch newlich erbarkeit der her dantzker castellan und Absolonn Reinman herrein geschreibenn, / thun aber von der gleichenn ferlickeit kein moldung. / Wo uns hernacher etzwas zukomen wirdt / und wir erfharen werdenn, / wollen wir euch solichs czeitig genug wissen lassen und darin vorwarnenn. Nichts desto weniger wellet alle dinge bei euch in unser stadt wol bostellen und ordnen, / das was czubesseren ist gemacht werde, / die thore und wo ess sunst von nothen mit genugsamer wache vorsorgen, / damit wo sich was eilende erhube / sie mit ihren dingen fertig sein. Von unserem kutelfischernn, / daruber die ersamen von Dantzig wegen des vormeinten ihnen zugefugten schadens / geclagt, / wollen wir inen das antwurt geben, / welchs ihr uns dismol in ewrem schreiben vormeldet. Das ihr auch den hern culmischen underkemerer Fabianum Czem / und den hern Miskousky alda von unsernt wegen wol gehalten und tractirt, / lassen wir uns gefallen, / bei ihnen aber etzwas an junger koninglicher majestet hof zuschreiben, / worzu sie sich erboten, / haben wir dismol nichts, den wir heute unser schreiben dahin gefertiget . / Die czugeschickten lechse, die uns uberantwurt sein, / thun herrn Bon[ere] zu dancke aus und bovelen euch hiemit gotlichen genaden .

Datum aus unserem schloss Heilsberg, 22 Julii 1547.

Advocato

Unsernn genedigenn grus zuvorann. Edler, gestrenger, lieber getreuer.

Beigeleg[te] brief werdet ihr aufsfurderlichste an den grosmech[ti]gen hern Achatium Czem, marienburgischenn wojwoden und auf Sthum heuptmann, bestellenn, / und darauf antwort bittenn u[nd] furderenn. Wo auch alda bei euch was von zeitungen wer..., wollet uns zuschreibenn. / Wir haben itzter nichts, / das wir euch hetten mugen mitteilenn.

Datum aus unserem schlosz Heil[s]berg, XXII Augusti M D XLVII.

Aduocato

Ioannes etc.

Unnsernn genedigenn grus zuvorann. Edler, gestrenger, bosunder, lieber, getreuer.

Wie ihr uns durch ewer schreibenn zuvorsthenn geben, / das euch von einem jungenn edelman, / der durch unser stadt Braunsberg gereiset, / sei angezeigt, / wie margraf Albrecht der junger / im zuge hieher ins landt zu furstlicher durchlaucht were, / und darauf bogeret zu wissenn, / wo ehr alda zukueme / ader nacht vorharren wurde, wess ihr euch halten sollet, / worauf wir euch diesenn boscheidt gebenn, / das ihr euch aufs freuntlichste und dinstlichste, / wie ihr wisset, / kegen sein personn erzeigt, / in auch mit bier / und was sunst unser haus vormag zimlicher und erlicher weise vereheret. Muget auch anzeigenn, das uns solcher durchzug unbewust, / sunst hetten wir vorschaffet, das den im mer ehr erzeigt were. / Wir wollen aber nicht, das im gentzliche ausrichtung gesche, / noch im fr... station / in unserm hause / gebenn werde. Hirnach wisset euch zurichten.

Datum aus unserm schlosse Heilsberg, den XVII Iunii M D XLVIII.