Multum magnifico et excellenti Domino, domino Iohanni Dantisco serenissimarum maiestatum Poloniae [apud] [cae]sarem oratori, domino observandissimo etc.

Apud caesarem

Multum magnifice et excellens Domine.

Multotiens ad Vestram Dominationem litteras dedi et, quia ab humanitate et virtute tua responsum non accepi, vereor, ne infidi fuerint litterarum portitores. Cum autem ad praesens in caesaris castris militaturus se conferat Lombardiam praesentium lator nomine comes factus de Russis de nostra Russorum familia et domini Ludovici consanguineus, ut ad caesaris curiam veniat Vestram Dominationem meo nomine visitatum, rogavi. Quam habeo exoratam, ut mihi dignetur suam bonam valetudinem significare et, quia magnificus dominus Levicius in Civitate Neapolis, qui meo honore et beneficio bonum opus effecit, ad quod perficiendum caesaris in meum favorem ad eiusdem regni ministros commendatitiae litterae mihi omnem tribuent dignitatem, ut per Vestram Dominationem quam citius fieri poterit a caesare impetrentur et ad me remittantur, pro eius inmensa humanitate ipsam exoro. Erit hoc opus maiestati suae servitio serenissimae reginae et domino Ludovico gratissimum et ego plus Tuae Dominationi quam mihi ipsi debere profitebor. Et quia res ardua non est, spero, quod tua valida intercessio sola sufficiet. Sin autem opus erit favore reverendissimi archiepiscopi nostri qui, ut audio, est multum amicus et frater Dominationis Vestrae, et ad quem in meum favorem scribit per eundem consanguineum meum eius vicarius generalis in hoc archiepiscopatu ipse, quatenus sibi visum fuerit, poterint invocare et uti, magis enim unita virtus fortior est. Vale, excellens domine et mei memor.

Ex terra Medunii, die ultimo Martii 153[0].

Ad servitia Vestrae Excellentis Dominationis paratissimus Sigismundus de Russis Barensis

Reverendissimo Domino, Domino Iohanni Dantisco, ...mo episcopo Culmensi et oratori ... maiestatum regis et reginae [Poloniae] ...no observandissimo etc.

Apud caesarem

Ihesus.

Quia tardissime fuit ad me perlatum, quod episcopali fueris dignitate illustratus, propterea sera gratulatio reprehendenda non est, Reverendissime Domine, qua de re tum gratulor et exopto, ut sempiternae Tuae Dominationi sit laudi dignitas ista, quae a viro magis illustratur, in quem collata est, cum etiam quibus verbis Dominationi Tuae gratias agam, non reperio, quod ad excellentem dominum Aliphium rescripseris, quod mei sis memor et studeas, quemadmodum possis meae exspectationi satisfacere, quam tua virtus, benignitas et humanissimae pollicitationes concitaverunt, verum quia per septennium in hac me continui exspectatione et interim temporis iacturam aliquam non feci, sed assidue in perorandis et patrocinandis causis forensibus me exercui, a quarum mercennaria opera cupio tandem me liberare. Vestram propterea Dominationem vehementer exoro, ut huic meae subvenias sollicitudini, vel (ut verius dicam) propriae consulas saluti et honori, et postquam bono sidere mihi datum est habere licere tantum virum mei honoris amplificatorem, ut, quod pro amico tuae virtutis studiosissimo coepisti opus, perficias, rogo, Reverendissime Domine, et mihi cures decerni alteram ex infrascriptis administrationibus: vel regiae aud<i>entiae provinciae Calabriae, vel provinciarum Idrunti et Bari, in quibus duo creantur proreges et {et} apud quemlibet duo creantur magistratus, qui provinciales auditores appellantur, sunt non modicae administrationis et solent per biennium vel triennium decerni. Verum quia triennalis dictorum officiorum administratio magnum mihi conferret honorem et utilitatem, Vestram Dominationem habeo exoratam, ut omnem necessariam operam impendat, qua mihi triennalis alterutrius per caesarem decernatur administratio. Ex praefatis utilior reputatur illa, quae geritur in provincia Calabriae et ea de re longe gratior mihi foret. Unum moneo Vestram Dominationem, quod si forte de dicta regia audientia Calabriae alius reperiatur provisus de recenti, itaque non sit in anno proximo sequenti vacatura, et obtinuerit Vestra Dominatio mihi decerni alteram videlicet provinciarum terrae Idrunti et Bari est necesse obtinere litteras cum clausula derogatoria privilegio istarum provinciarum, quo cavetur, ne provincialibus possint dictae administrationes decerni. Etsi pro anno immediate sequenti de praefatis regiis audientiis fuerit in alios facta collatio, itaque in anno sequenti non essent vacaturae, esset pur mihi gratum provideri de altera ex administrationibus iudicatuum magnae curiae vicariae in civitate Neapolis, quae in anno proximo vel de mense Septembris vel Martii sunt vacaturae, per quam iudicatuum administrationem mihi pateret aditus ad maiora, si maioribus me dignum iudicarent, et ne vacuus altera ex praefatis administrationibus remaneam. In anno proximo sequenti Vestram Dominationem habeo exoratam, ut si possibile erit ante ingressum mensis Septembris sequentis anni, alteram ex dictis provisionibus dignetur ad me remittere. Vale igitur, Reverendissime Domine, et amici non esto immemor, qui omnem rem suam, causam seque totum tuae virtuti, fidei tradidit atque benignitati.

Ex Bari civitate, Nonis Iulii 1531.

Vestrae Reverendissimae Dominationis devotus servus Sigismundus de Russis Barensis

Reverendissimo in Christo Patri, domino Ioanni Dantisco episcopo Culmensi serenissimarum maiestatum Poloniae [secreta]rio et oratori etc., domino plurimum ho[norando]

Apud caesaream catholicamque maiestatem

Reverendissime Domine.

Plures, quas ad Vestram Reverendissimam Dominationem mensibus decursis dedi litteras Vestrae Dominationis benignissimum et peroptatum desiderant responsum, verum, quia vereor, ne infidi eas interceperint vel neglexerint tabellarii, rescribere decrevi non nimis veritus Vestrae Dominationis benignissimas aures tot litteris offendere, posthac tuae Dominationi summa benignitas et proprii honoris sollicitudo et tot diuturnae ac humanissimae expromissiones in me omnem spem de tua virtute concitaverunt. Verum quia de mense Septembris sequentis anni proximi futuri in provincia Calabriae vacat administratio unius ex auditoribus dictae provinciae, quae solent alias decerni per biennium et alias per triennium, propterea Vestram Reverendissimam Dominationem habeo exoratam, ut dictae provinciae Calabriae proximam vacaturam audientiae administrationem per triennium a caesare pro me impetrare dignetur, et quidquid erogare necesse erit, per litteras cambii per bancos Belzerorum(!) remittere, quod in hac civitate habent negotiatores et respondentes, vel Neapoli{s}, et statim remittentur, et perquam gratissime, et si remitterent<ur>, dictam administrationem decernere per triennium Vestram Dominationem exoro, ut instet pro obtinenda triennali administratione, quia solet alias concedi et magno mihi erit commodo et honori. Vale, Reverendissime Domine, et me totum honorem quam meum Vestrae Reverendissimae Dominationi tutissime et benignissime protectioni committo et mand[o].

Ex Bari civitate, XII Novembris 1531.

Vestrae Reverendissimae Dominationis humilis servus Sigismundus de Rus[sis] Barensis ...