Woienousky.

Unsernn etc.

Wir habenn diss itzige unser schreibenn / derwegenn an euch beidenn gestelt, / damit wo der eine nicht am hofe were, / der ander dassulbe macht hette zu brechenn, / und wir dennoch antwurth bekomenn mochten. Ess ist uns auch fast angenem, / das ihr uns mit ewrem schreibenn zu bosuchenn nicht nachlosset, / dem wir ferner bittenn also idere czeit nachzukomenn, / und wo wir euch viel furderung und angenemen willenn ... zu wir uns erbitten, zu ewrer besserung werdenn erzeigenn kunnenn, / findet ihr uns das zuthun, wie ihr uns den zuvor auch gespuret, alwege genigt. / Von newenn czeitungenn haben wir dismol nichts, das czuschreibenn were . / Wo wir aber hernacher was glawbwirdiges erfharenn, / wollen wir euch solches mit zuteilenn nicht nachlassenn. / Welches wir auch herwidder, / wo da etzwas gewisses am hofe sein wirdt, / uns czuczuschreibenn freuntlich thun bitten. / Gotlichen genaden mit langweriger gesuntheit bevolen. /

Datum aus unserm schlosse Heilsberg, den 30 May 1547.

Michaeli Voinowskii

Unserenn freuntlichen grus und alles guts zuvorann. / Edler, ernvhester, bosunder, gutter freundt. /

Wiewol dismol nichts bei uns euch zuschreiben gewesenn, / dieweil wir aber diesen bothen an junger koninglicher majestet hof abgefertiget, / haben wir nichts lassen mugen, sunder euch hiemit ersuchenn mussenn, / und darneben anczeigen, das wir kurtzlich uns noch Graudentz zu der tagfarth begeben werdenn, / da wir alsdan uns mit ewrem bruder, dem edlen, ernvhesten hern Peter Voinousk[i], heuptman, daselbst, / wie wir uns vorlossen in alda zufinden, / schen, / und freuntlich boreden wollenn. / Wo ihr nu e[t]was an gemelten ewren bruder zuschreiben bodocht wert, muget ihr solchs / durch diesen boten an uns fertigen, / de[n] wir ferner an ihn bostellen wollenn. / Bitten auch freuntl..., wo da was von zeitung bei euch sein, / uns die u... neben dem, was sich sunst alda zutregt, mitzuteilen nicht nachzulassen. Got[lichen] genaden bovolen.

Datum aus unserm schloss Heilsberg, den III Septembris 154[7].