Reverendissimo in Christo Patri et Domino, domino Ioanni Dei et Apostolicae Sedis gratia episcopo Warmiensi, domino et maiori observandissimo

Reverendissime in Christo Pater et Domine, domine benefactor et consolator humanissime.

Quemadmodum alias significavi Reverendissimae Dominationi Vestrae, quomodo in conflictu cum duris officialibus huius curiae super iuribus meis integre extrahendis constitutus eram, ita nunc enuntio altercationis exitum votis meis etiam gratis cessisse usque ad unum decanum subdiaconorum sive cruciferorum papae, qui contra decretum pontificis et omnium cardinalium consistorialiter conclusum, ut mihi pallium absque quacumque pecuniarum solutione iuxta concilia veteris ecclesiae gratis permittat, adversatur. Sed ipse ut Pluto per flumina inferi: Letheum, Stigiam(!), Flegetonten, Cochytum, etiam per Ziziphum me mittere nititur, quia pecuniam reddere nolo. Ex alio latere surgunt cardinales, qui minime permittent, ut illi etiam teruncium solvam, est enim tale artificium praesertim adinventum per illos etc. homines, Calchaneo archiepiscoporum in datione vel negatione pallii ut insidientur , tandem victor ero etiam contra illum Scarabeum sine macula.

De novitatibus harum partium videlicet legatis: missi pro pace, quae forte erit etiam propter angustias Galli. Item de Hungaricis novis: dominus Gasparus Hannovius utique se resolvet, qui in talibus explorandis satis sagax est et circumspectus, optime suam vitam et conversationem inter omnes homines ducens, quemadmodum scribo carissimae matri eius, dilectae sorori Reverendissime Dominationis Vestrae, quae felicissime valeat.

Ex Urbe, 6 Decembris 1544.

Eiusdem Reverendissimae Dominationis Vestrae obsequiosus amicus Olaus Gothus archiepiscopus Upsalensis