Domino palatino Pomeraniae.

Unsernn etc.

Was wir am neheren mal Ewer Herlichkeit zugeschrieben und in demsulbtenn / wegen furstlichen durchlaucht briefe an alle hern disser lande redte, / des copie wir danebenn Ewer Herlichkeit zugeschicket, / ferner an den hern marienburgischen wojwojdenn zubestellen, / angezeigt, / czweifelenn wir nicht, solchs Ewer Herlichkeit bekommen / und genugsam eingenomen habe. / Dieweil wir aber aus des grosmechtigen hern marienburgischen wojwoden / schreibenn vorstandenn, / das gedochte briefe ihm noch nicht zukomen seindt, / ehr auch darumb noch kein wissentschafcht habe, / bitten wir freuntlich, wo solche noch nicht an den orth geschicket, / aufs erste zu vorschaffen, damit die neben diesem hiebegelegten unserm brife und der abschrieft furstlicher durchlaucht anderem schreiben, / so ehr an uns in sunderheit gethan / und doch den hern redten mitzuteilen bogeret, / dem grosmechtigen hernn marienburgischenn wojwoden / zu schanden kommen mochtenn, die uns auch was ihr bodenckenn und rath sei, / auf beidte furstlicher durchlaucht schreibenn, / daran uns allen nicht wenig gelegenn, / wolte wissenn lassenn, / damit solchs sunder seumen, / an koningliche majestet mag gebracht werdenn, / ader dem durch andere wege vorkomenn, / wie den ... Ewer Herlichkeit am besten bei sich wirdt bedenckenn und boradtslagenn. / Sunst haben wir auch dem hern marienburgischen underkemerer und seinem ohem Ioanni Lubozewskii auf Ewer Herlichkeit schreibenn, / was die thumrei bolangt, alle furderung erzeigt, / wie sie den das sulbst Ewer Herlichkeit, die wir gotlichen genaden bovelenn, / nicht vorhalten werden.

Heilsberg 20 Junii 1547.