Dem durchlauchten, hochgebornen fursten und herren, hern Albrechten, marggraffen zu Brandenburg, / in Preussen, zu Stetin, / Pomern, / der Cassuben und Wenden hertzog, / burggraff zu Normberg und furst zu Rugen, / unserm hochgunstigen, lieben herren unnd freunde /

Durchlauchter, hochgeborner furst, hochgunstiger, lieber her und freundt. / Unser freuntliche und vleiswillige dinste zuvoran. /

Uns ist gestrigs tags Ewer Furstlichen Durchlaucht schreiben, / datum Lick den XV dits, / und dorÿnnen ein abschrift des, / wie Ewer Furstliche Durchlaucht koniglicher maiestet, unserm allergnedigisten hern, geschrieben, / zukommen, / die wir mit vleis uberlesen, / und uns der sachen notturft nach fast wol hat gefallen, / dornach wir uns auch, / so bald wir an koniglichn hoff werden schreiben, / wollen richten, / und so vil an uns ist, / anhalten, / das bei romischer keyserlicher unnd koniglicher maiestet die ubergebne im reichstage supplicacion / in iren gang und entschafft wurd gefurdert, / dieweil solchs von hoen und andern stendenn des reichs begert und gebethen ist. / Was wir hierinne Ewer Furstlichen Durchlaucht zu ehren und nutz / und uns allen hie im lande zu gut werden wissenn und mugen ausrichten, / sal uns nicht beschweren. / Erbiethen uns auch willig und geflissen, / welchs wir derselbten Ewer Furstlichen Durchlaucht, / die wir gotlichenn gnaden in langweriger gesuntheit und aller wolfart bevelhen, / zu freuntlicher antwort nicht haben wollen vorhalten. /

Datum Heilsberg, den XXIII Septembris M D XLI. /

Ioannes von Gots gnaden bischoff zu Ermelandt /

qui supra manu propria subscripsit