Matz Platenn

Unsernn gunstigen grus und alles guts zuvorann. Erhafter, bosunder gutter freundt.

Hiebeigelegt schicken wir euch / ewer bitte noch / unser vorsigelte vorschrifte an einen ersamen radt koninglicher stadt Dantzig und Marten Banden neben deren copien, die wir euch und ewrem sweger Cornelio von Staden ausz[u]geben / unboswert seindt gewesen, / und wunschen, das diesulbenn / Cornelio und seiner sachen, / wie wir nicht czweiflenn wollen, / dieweil sein widderteil / dem rechten den ru... gebt, / und das meidet, / viel gute wirkenn. Kunnen wir ... hernacher ferner euch und in furderenn, / soll nichts an u[n]serem gutten willen abghenn. Ess wirdt euch auch kegenwertiger czeiger, Peter Brasch, czw[an]zig marken ewer nowlhan, und ewer hausfrawen drei ungresche gul... von unsernt wegen uberantwortenn. / Die wollet also vor gu[t] annemen, / und die bucher, so wir im mitgeben, / das sie uns ... da fleisiglichenn eingebundenn werden, / durch ewre furderung vorschaffen. Bei unserm bruder Georgen werdet ihr unser wapffen, / das wir auf unsere buchere pflegen dem... czulassen, finden. / Das wollet zu euch nemen, / und solchs, das ess auf diese beid[en] bucher gedrucket, bostellenn, und fleisich achtehaben, / das nicht im einbind vorsetzet [we]rde. Gotlichenn genaden bovolen.

Datum aus unserm schloss Heilsberg, den XXXI Decembris M D [XLVII].