Reverendissimo in Christo patri, domino, domino Ioanni, Dei gratia episcopo Culmensi, amico carissimo et honorando

Reverendissime domine, domine mi amice et frater carissime.

De negotio postulationis agam, ut optat Dominatio Vestra Reverendissima, verum praestolandum duxi, donec veniat huc dominus Alexander Sculteti. Nam regia maiestas agit nunc Leopoli et nos hic adhuc exspectamus reditum nuntii a Valacho, a cuius reditu certiores fiemus bellum an pax sit futura. Neque est aliud, quod scribendum in praesens putem. Opto, ut Vestra Dominatio Reverendissima ex animi sententia sit felix et incolumis.

Cracoviae, prima Augusti MDXXXVII.

Vestrae Dominationis Reverendissimae frater Ioannes nominatus Cracoviensis regni Poloniae cancellarius scripsit