Reverendissimo in Christo Patri et Domino, domino Iohanni Dei gratia episcopo Culmensi, postulato Warmiensi et administratori Pomezaniensi, dignissimo domino nostro, gratiosissimo et colendissimo

Reverendissime in Christo Pater et Domine, domine gratiosissime et colendissime.

Nostra humili servitiorum et orationum commendatione praemissa.

Cum Reverendissima Paternitas Vestra, prout ex litteris venerabilis domini cancellarii, confratris nostri, intelleximus, unum ex nobis de gremio sui capituli ad se optat mitti cum plenaria facultate ob certos tractatus de anniversario et rebus relictis honorabilis domini Alberti in Domino def[unc]ti habendos. Itaque mittimus venerabilem dominum Vincentium canonicum, confratrem nostrum, viribus validiorem pro hoc itinere et negotio perficiendum cum plenaria facultate. Et Reverendissimam Paternitatem Vestram, ut clementissimum dominum nostrum, oramus obnixe eidem plenariam fidem in omnibus, quaecumque in hoc negotio nomine capituli coram retulerit, habere dignetur.

Cum hiis nos singulari gratia Reverendissimae Paternitatis Vestrae in omnibus commendamus et eandem felicissime et diutissime valere exoptamus. Pro quo consequendo Deum altissimum nostra indigna prece continue exoramus.

Datae in Culmenze, tertia feria infra octavas Epiphaniarum anno Domini etc. XXXVIII-o.

Eiusdem Reverendissimae Paternitatis Vestrae humiles capellani et servitores, capitulum ecclesiae Culmensis