Dilecto Filio Ioanni Dantisco electo Culmensi

Clemens etc.

Dilecte Fili.

Salutem etc.

Meritis tuae devotionis inducimur, ut petitionibus tuis, quantum cum Deo possumus, favorabiliter annuamus.

Cum itaque nos alias postquam ecclesiae Culmensi, tunc certo modo pastoris solatio destitutae, de persona tua de fratrum nostrorum consilio per quasdam sub plumbo expeditas duxeramus providendum, praeficiendo te illi in episcopum et pastorem, tibi, ut usque ad unum annum proxime tunc futurum, a fine temporis de consecrandis episcopis a canonibus definiti computandum, munus consecrationis suscipere minime tenereris nec ad id a quoquam invitus compelli posses per quasdam primo et deinde cum nobis exponi fecisses, quod tu infra dictum annum, ut praemittitur, concessum pro eo, quod pro carissimo in Christo filio nostro Sigismundo Poloniae rege illustri apud carissimum in Christo filium nostrum Carolum Romanorum imperatorem semper augustum orator destinatus fueras, impeditus munus ipsum infra dictum annum suscipere commode non poteras. Annum ipsum ad alium annum a fine eiusdem anni, ut praemittitur, concessi... computandum, per alias in forma brevis litteras ampliaverimus et prorogaverimus, prout in illis plenius continentur. Et sicut exponi nobis nuper fecisti, infra dictum annum, ut praemittitur, ultimo prorogatum, cuius finis de proximo instat, cum animi tui quiete certis de causis munus consecrationis huiusmodi commode suscipere non speres, et propterea nobis humiliter supplicari feceris, ut annum ultimo tibi concessum huiusmodi ad aliquod aliud tempus prorogare de benignitate apostolica dignaremur. Nos commodis tuis in praemissis peramplius consulere volentes, tuis in hac parte supplicationibus inclinati, annum praedictum ultimo prorogatum, infra quem (ut asseris) adhuc existis, ad octo menses, a fine ultimo dicti anni huiusmodi computandos, quibus durantibus munus consecrationis huiusmodi suscipere minime tenearis, nec ad id a quoquam invitus compelli possis, praemissis ac Lateranensis concilii et quibusvis aliis constitutionibus et ordinationibus apostolicis necnon dictae ecclesiae etiam iuramento confirmatione apostolica vel quavis firmitate alia roboratis statutis et consuetudinibus ceterisque contrariis nequaquam obstantibus auctoritate apostolica tenore praesentium absque spe ulterioris prorogationis pariter extendimus.

Datae Romae apud sanctum Petrum, sub annulo Piscatoris, die XXI Aprilis 1533, pontificatus nostri anno decimo

Blosius