Reverendissimo in Christo Patri ac Domino, domino Ioanni Dei gratia episcopo Warmiensi, domino nostro colendissimo et gratiotissimo

Post debitam obsequiorum ac reverentiae exhibitionem.

Reverendissime in Christo Pater ac Domine, domine colendissime.

Maximo omnium dolore venerabilis dominus Mauritius, confrater noster longe carissimus, e umorum contubernio in coelestem beatissimam animarum patriam migravit. Quod quidem cum 13 huius accidisset et nobis de confratre alio in numerum nostrum adoptando cogitandum esset, Reverendissimae Paternitati Vestrae significandum duximus ecclesiae vulnus, quod obitu viri integerrimi accepit, rogamusque Reverendissimam Paternitatem Vestram, ut singulari sua prudentia ecclesiae commodis prospicere et de confratre, cui res nostrae cordi sint, cogitare dignetur.

Praescripsimus autem electioni diem 21 huius mensis, qui tertius est post Palmas, ut interim et confratres more maiorum consulantur, qui in limitibus provinciae degunt.

Quem ut diem Reverendissima Paternitas Vestra suo consensu confirmet novumque confratrem suffragio nobis declaret, vehementer oramus. Vicissim, quod in rem Reverendissimae Paternitatis Vestrae esse putaverimus, nihil omittemus.

Qua<m> feliciter valere optamus.

Datae ex Frauenborgk, anno 1546, die vero Aprilis 15.

Eiusdem Reverendissimae Paternitati Vestrae obsequentissimi praelati et canonici, capitulum Warmiense