APG 300, 53, 393, p. 26

Den ersamen und namhaftigen herren burgermeister und ratman der koniglichn stad Dantzig, unsern besondern, guten freunden

APG 300, 53, 393, p. 23

Unsern freuntlichen grus und alles guts zuvoran. / Ersame, namhaftige herren, besondere, gute freunde. /

Wir haben hievor zeigern dits, Simon Hochertz, an E(wer) E(rbarkei)t von wegen der erbschaft, so sein halbbruder Ambrosius Hogenstein binnen Euer stad / nach seinem todt hinder sich gelassen und auff in gefellet, / das er zu der, / ane unnottige vorzoge und unkosten, dester eher kommen het mogen, vorbitlich vorschrieben, / welcher uns itzo undertheniglich bericht, das er im etliche wissen mit seinem grossen, merglichen vorseumnis und schaden zu E(wer) E(rbarkei)t derwegen gethan / und nach zuvorhoftem ende nicht gelangen konte / und uns mit vleis ferner gebeten, im mit unser schrift zum andern mal gnediglich zuerscheinen, / das wir im der pilligkeit nicht haben wollenn vorschlagen. / Bitten derwegen nachmals freuntlich, / gedachtem Simon Hoghertz zu solcher angefallener erbschaft, so vil er befugt und recht hat, zuvorhelffen / und volgen lassen und in mit ungewonlicheit und neuerung, / wie er anzeigt, / nicht aufhalten, / dan die zwene unsere burger alhie, / Hans Rottermundt und Jacob Straus, so vor gericht sich vor die nachmanung mit iren gutern vorpflicht sein, gnugsam besessen, / das unsers erachtens APG 300, 53, 393, p. 24 nicht nottig, / auch der gebrauch und ubung nicht sei, / das sich ein radt vor inen solt vorschreiben und selbs gutsagen, / wie E(wer) E(rbarkei)t seinem bericht nach bei im anmutend gewest. So wir doch gewis dovor halten, / E(wer) E(rbarkei)t wurden sich in gleichem falh vor die iren, / welchs nirgent anderswo der gebrauch, / dermassen selbst auch nicht obligirn und verpflichten, / weil es auch dieses landts gewonheit an keinem ort, so vil uns bewust, anderst helt, / dan das man vor nach manung, do man gesessen, burgschaft zusetzen schuldig ist und das nicht anders, dan mit besessenen leuten, / wie kegenwertiger gethan. / Derhalben bitten wier, wie zuvor, E(wer) E(rbarkei)t woltengedachten Hogheitz dieser unser vorschrift zur billigkeit gemessen lassen. Das wollen wir unb dieselbte E(wer) E(rbarkei)t, die wir gotlichen gnaden hiemit bevelhen, / in gleichmessigem falh und meherm mit aller freuntlicheit beschuldenn. /

Dat(um) aus unserm schlos Heilsberg, den XXII Iunii M D XLII. /

Joannes, von Gots gnaden bischoff zu Ermelandt /