BCz, 247, p. 160

Reverendissimo in Christo Patri, domino I<o>anni Dei gratia episcopo Culmensi, fratri et amico carissimo ac honorando

BCz, 247, p. 157

Reverendissime in Christo Pater et Domine, frater et amice carissime ac honorande.

Promovi diligenter maiestati regiae petitionem Reverendissimae Dominationis Vestrae de remittenda illi in bonis episcopalibus nuper decreta contributione factam. Sed adhuc id obtinere non potui, dicente maiestate sua se in remittenda hac contributione nullam prorsus habere facultatem, cum omne id, quod contribuetur, in fiscum istius provinciae deponi debere, sit constitutum. Dabo tamen operam, ut alio tempore in hoc desiderio Dominationis Vestrae Reverendissimae a maiestate regia satisfiat. Interim Dominatio Vestra Reverendissima in bonis suis exigi et colligi pecuniam faciat.

Mitto Dominationi Vestrae Reverendissimae exemplum responsionis per maiestatem regiam domino episcopo Varmiensi et eius capitulo factae. Quam in hanc sententiam scripsi, sicut et Dominatio Vestra Reverendissima censuit et ego ipse commodum iudicavi.

Allatum est breve apostolicum, quod mitto cum praesentibus, vigore cuius promoveri ad sacros ordines iam quibuscumque diebus festis Dominatio Vestra Reverendisima poterit. Ad quam consecrationem cum iste futurus Pyotrkoviensis conventus optimam occasionem Dominationi Vestrae Reverendissimae BCz, 247, p. 158 obtulit, illam rogo, ut se ab eo non subtrahat, sed maturius quam potest in nostram, qui erimus, congregationem veniat, nam ego spero non diuturnam illic moram nostram futuram. Ego autem et fungar officio consecratoris, et omnia, quae erunt necessaria ad suscipiendum munus consecrationis, Vestrae Reverendissimae Dominationi suppeditabo.

Quod de Alexandro Sculteti fieri optavit Dominatio Vestra Reverendissima, effeci, ut fieret, regias enim litteras et ad dominum episcopum et ad capitulum ecclesiae Varmiensis, ut illum compescerent, scribi feci, quibus permoveri illum satis confido, ut in posterum Dominationi Vestrae Reverendissimae nullum negotium facessat.

Pacta et condiciones inter regiam maiestatem et illustrem dominum ducem Prussiae recepta in hoc exemplo litterarum praesentibus alligato Dominationi Vestrae Reverendissimae mitto.

Quod vero reliquum est, me amori et benevolentiae illius fraternae commendo et felicem illam esse atque semper salvam ac incolumem ex animo opto.

Dat(ae) or Dat(um)⌈Dat(ae)Dat(ae) or Dat(um)⌉ Cracoviae, die XXII-a Decembris anno Domini M-o D-o XXXII-o.

Vestrae Reverendissimae Dominationis Petrus episcopus Cracoviensis et vicecancellarius subscripsit