» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #1001

Stanisław KOSTKA to Ioannes DANTISCUS
Marienburg (Malbork), 1533-09-04
            received [1533]-09-07

Manuscript sources:
1fair copy in Latin, AAWO, AB, D. 67, f. 220

Auxiliary sources:
1register in Polish, 20th-century, B. PAU-PAN, 8247 (TK 9), f. 357

Prints:
1AT 15 No. 436, p. 598 (in extenso; Polish register)

 

Text & apparatus & commentaryPlain textText & commentaryText & apparatus

 

AAWO, AB, D. 67, f. 220v

Reverendissimo in Christo patri et domino, domino Ioanni Dei gratia episcopo Culmensi, regiaeque maiestatis dioecesis Pomezaniensis administratori dignissimo, domino et fautori mihi gratiosissimo

AAWO, AB, D. 67, f. 220r

Reverendissime in Christo pater et domine, domine mihi gratiosissime. Post obsequiorum meorum erga Reverendissimam Dominationem Vestram indefessam promptitudinem.

Optat Reverendissima Dominatio Vestra certior fieri, quomodo in donationem sacrae maiestatis regiae Reverendissimae Dominationi Vestrae factam cum dominis exactoribus convenerim, quo sciret maiestati regiae aut habere gratias aut conqueri. Nolo igitur Reverendissimam Dominationem Vestram latere, quomodo nonnullis ante exactis diebus in his negotiis dominus Plemenszky contributionum terrae Culmensis exactor, unus mecum conferebat aiebatque sacrae maiestatis regiae litteras, ab Reverendissima Dominatione Vestra illis traditas, intellexisse, quomodo maiestas sacra regia pecunias contributionis ab Reverendissima Dominatione Vestra eiusque Reverendissimae Dominationis clero et subditis provenientes, eas pecunias contributionis ob per ignem perpessam calamitatem Reverendissimae Dominationi Vestrae dimisisse et donasse et ideo eis praecepisse ... illegible⌈...... illegible⌉ Reverendissimam Dominationem Vestram eiusque Reverendissimae Dominationis clerum et subditos de tali contributione non inquietare et monere, in quibus mandatis regiis se velint reddere conformes et oboedire, et Reverendissimam Dominationem Vestram eiusque Reverendissimae Dominationis clerum et subditos am{m}odo non monere aut inquietare. Cum vero sacra sua maiestas regia, dominus meus clementissimus, nihil in his negotiis dignata est mihi significare, nedum in dictorum dominorum exactorum litteris mei fecerit mentionem, arbitror non licere in negotium, quod solis dominis exactoribus per litteras regias est commissum, me intromitti. In quibus vero Reverendissimae Dominationi Vestrae praesto esse decuerit et poterim obsequi, semper ero et sum obsequentissimus Reverendissimae Dominationi Vestrae, mihi gratiosissimo domino et fautori, cuius gratiae et favori me una cum obsequiis meis humillime recommitto.

Datum ex arce Marienburgensi, quarta Septembris anno Domini etc. 33.

Eiusdem Reverendissimae D(ominationi) Vestrae obsequentissimus Stanislaus Costka a Stangenberg, regiae maiestatis terrarum Prussiae et arcis Marienburgensis thesaurarius scripsit