AAWO, AB, D. 7, f. 56r (t.p.)

Du wirst h(ern) Jorg(en) vor das ihenige, das er durch dein schreiben mich hot lossenn wissenn, / freuntlich danckenn / und bitt(en) vortann, / was sich wirt inn der handlung mit Putzke begebenn, / mir vortraulich durch dich wolde zuschreibenn. / Ich besorge mich, / sovil ich davon verstandenn, / wurdenn sie sich abermhals durch den schein mit der gemeine koniglichem willenn widrenn, / das ein gewisser fhal der stadt wurde zukomen. / Got wolde mich den antzuseh(en) / so lange nicht lassen leben etc. Welchs alles der g(nedige) h(er) wirt ursach(en), / der sich mit der gemeine an ko(nigliche)m hove wirt wollen rein machenn, / geschicht dergleich(en) was, wie michs bedunckt, / unnd auch aus der Crone wissenschaft hab, / wirts der ertzb(ischoff) und sein anhanck nicht mug(en) wenden, / dem inn der Crone vonn idermenniglich ubel wirt noch geredt etc. Das erbitt(en) des g(nedigen) h(ern) vorstehe ich wol. / Du hest wol gethann, / das du bist zu ihm gangenn. / Omnia tempus habent. / So balde ich vonn dir aus mitteilung her Jorgens werde wissenn, / was mit der gemein vorhandelt unnd ob sie den hernn schatzmeister inn ko(nigliche)m nhamen in Putzke wollen loss(en) oder nicht, / wil ich Moritzen noch Krako fertig(en). / Derhalbenn wirstu durch eignen bothenn ufs eilentste an mich schick(en) unnd weitleuftig alles, was du erfarenn wirst, schreiben, / nemlich wie sich in allen ding(en) der g(nedige) h(er) gehalten, / oder noch vor hott etc. dabei auch vonn der Lisemannisch(en). / Endeuich hot mit hie gesagt, wie sie mit ihm sein umbgangenn, und haben ihn da zu rechte wolt hemmen / unnd den konig vorladenn, / mit des mandat er dahin zeucht gekomen. / Es zeucht sich alles, wie es fallenn wolde etc. Hernn Jorg(en) wirstu grussenn / und thun, wie ich dir hie mit bevolh(en) etc. etc.