Reverendo in Christo Patri, domino Ioanni episcopo Varmiensi, sincere nobis dilecto

Sigismundus Dei gratia rex Poloniae, supremus dux Lithuaniae, Russiae, Prussiae, Masoviae etc. dominus et heres

Reverende in Christo Pater, sincere nobis dilecte.

Tenet procul dubio memoria Paternitas Vestra, quantopere fuerit a nobis flagitatum, ut illustrem dominum Albertum, marchionem Brandemburgensem et in Prussia ducem, nepotem nostrum carissimum, prohiberemus monetam cudere, postquam ipsi desiimus, quaeque fuerint ex comitiis terrarum nostrarum Prussiae de ea re nobis consilia suppeditata, nos porro omni studio conati sumus efficere, ut is monetam cudere desineret. Sed cum nihil profecissemus, matura cum regni nostri consiliariis habita deliberatione decrevimus monetam illustris domini ducis e regni nostri finibus exterminandam esse, cuius decreti nostri formulam Paternitati Vestrae mittimus, ac si quid illa addendum putet, quidque de ratione hac exterminandae monetae sentiat, perscribi nobis a Paternitate Vestra postulamus.

Datae Cracoviae, XVII-o Martii, anno Domini millesimo quingentesimo quadragesimo sexto, regni nostri XL-o.

Ad mandatum sacrae maiestatis regiae proprium