Unns ist Ewr Erbarkeit ⌊⌋ zu kommen belangend ein etliche Gerdrawt, / das unns nicht wenig befrembd, / nemblich so Ewr Erbarkeit anzeyen, unns und den unnsern zu ehren, / derhalben unns gern vor mundtsperung zuverhuetten gewilliget, / und dennoch unserr erbe und hawss bey Sant Iohanns thor, / das unns, mit den buden daran gelegen, hundert und uber XXX marc geringe zynset, / lassen bey nagel und ringe uber reichen von wegen III-c hauptsuma und XXXV marc geringe, / wie angezaigt wirt, versessens zynses, / so Ewr Erbarkeit wissen, das solhe erbe und haus unns und unser lieben fraw ⌊muetter⌋ mit den unnsern und sunst niemants zcw stee und gehore, / ouch nicht angemerckt, / das wir mit dem brewerr, der in gedochtem unnserm hawse sytz und wonet, ein contract und vertrag haben lassen machen, / daran zu der zeit Gerdrawt genugen hat gehabt, / das solher zynss, / do Gerdrawt ouch etlich gelt aufentpfangen, ir durch gedochtem brewer mit der hauptsuma, / als / alle jar hundert marc biss zu vollerr bezallung, / suld uberreicht und bezalt werden, / welhs gedochter / brewer, so er darumb gesogt, / an tag wirt geben und bekennen, wer auch jemants gewest, / der unns gern vor mundtsperung vorhuet het wellen, so wir unnser erb von XXXV marc wegen, / die wir, Got hab lob und dannck, mit dannckparheit hetten mocht weder gelden, / nicht mit solhem geschrey und process bey nagel und ringe und mit solhen gezewgnis dar geben werden. /
Das aber Ewr Erbarkeit ire ladung wider unser liebe fraw ⌊muetterr⌋ hat so lannge ausgehalden, ist unnoth gewest. / Wer jemant darmit kommen, / oder nochkommen wirt, / sol billicher weiss entpfangen werden. / Unnser liebe fraw ⌊muetterr⌋ hab wir auf unserm slosse in solhen ehrn, wie sichs zymet. / Gebeut auss unnserm befellich dem ⌊rothe⌋, / der von unns geseczt / und uns underthan ist, / zur ⌊Lobaw⌋, / welher so wenig Ewr Erbarkeit geboth oder willen gehorsam werden sein, / alse die under Ewr Erbarkeit nicht in solhen eygenthun, wie die unnsern gesessen unns werden gehorsam leisten, / so wir unns des selbigen / so thunsynnigt, / das weit von unns ist, / understunden, derhalben mogt solhe ladung frey lassen gheen. / Wer aber unnsers bedunckenns und von unnser freuntlicher zu naygung, die wir zu Ewr Erbarkeit und der guettn stadt tragen, / nutzlicher und besserr, das man sich so zu unns und den unsern nicht theth nottigen. / Das hab wir auf gedochts schreiben, / welhs copeyen wir nicht ane ursachen hie bey gelegt, / Ewr Erbarkeit, die wir Gothe dem almechtigen in sein gnad thun befellen, freuntlicher weiss nicht wolt bergen. /
