Den ersamen und namhaftigen herren burgermeister und ratman der koniglichen stad Dantzk, / unsern besonndern, guten freunden. /

Unsern freuntlichen grus und alles guts zuvoran. Ersame, namhafftige hern, besondere, gute freunde. /

Es haben sich hie vor uns unsere liebe bruder und schwestern von wegen unsers lieben vater und mutter, / den Gott gnedigk sey, / nachgelassner beweglicher und unbeweglicher guter undereinander mit unserm zulass freuntlich vortragen / und zuvoraus hat unser lieber bruder und heubtman uff Rossell, der erbar und ernvhest Jorg von Hoven, / anders Flachsbinder gnant, / unserm lieben schwager und heuptman uff Seheburg, dem erbarnn, ernvhesten Hansen Glaubitz / seines ehegaten anteill / unser schwester, fraw Catherinen, recht und aufrichtig abgekaufft, / woruff gemelter unser schwager / hie vor unser stad gerichte Heilsperg Hansen Holsten hat gemechtiget, / solch sein anteill von seiner hausfrauen wegenn / im unserm bruder vor Ewer Erbarkeit aufzutragen / und zuvorschreiben lassen. / Derhalben ist an Ewer Erbarkeit unser freuntlich bitt, / solchen ufftrag und vorschreibung wolten gestatten und helffen furdern / und gedachten unsern bruder, / der in unserm nahmen in etlichen gescheften Ewer Erbrakeit wirt freuntlich anreden, / in gunsten bevolhenn haben, / welchs wir in aller woltettigheit umb Ewer Erbarkeit, die Gott zu langen zeiten in wolfart unnd gesuntheit wolde erhalten, zubeschulden gneigt sein / und willig. /

Datum aus unnserm schlos Heilsperg, den XXIIII tag Februarii M D XLII.

Joannes, von Gots gnadenn bischoff zu Ermelanndt /