Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, / zu Stetin, Pommern, der Cassuben und Wenden hertzogk, burggraff zu Normberg und furst zu Rugen, / unserm hochgunstigen, lieben herrenn und freunde /

Durchlauchter, hochgeborner furst, hochgunstiger her und freundt. / Unsere freuntliche und vleis willige dienste zuvoran. /

Es ist uns Ewer Furstlichen Durchlaucht schreiben, / datum Konigsberg den XIII dits, / gestrigs tags geworden, / doraus wir gerne vornommen, / das Ewer Furstliche Durchlaucht nicht hat misfallen, / was wir negst / unserm einfeltigen vorstandt nach / dem edlen, er[nvhe]sten und hochgelerten hern Johan vonn Creitzen, Ewer Furstlichen Durchlaucht cantzler rath und beider rechte doctor, / vortrauter weis an Ewer Furstliche Durchlaucht / uff derselben erfordern / zubringen mitgegeben. / Ist auch unnotig derwegen uns zudancken, / so wir sonst unbeschwert Ewer Furstlichen Durchlaucht mit vleissigem willen gern freuntlich dienen. /

Was uns weiter uff gemelts hern cantzlers und rath / in unserm nahmen / antragen / Ewer Furstlichen Durchlaucht der zufuhr halben hat zugeschrieben, / dieweil dieser handell uns nicht allein, / sondern auch unser wirdig capittell mit beiderseits underthanen betrifft unnd angehet, / wollen wir semptlich Ewer Furstlichen Durchlaucht in kortzer gelegner zeitt freuntlich und dinstlich beantworten, / bittend, diesenn nicht langen vorzug uns zu gutt in gunsten zu halten, / welchs wir freuntlich umb dieselbte Ewer Furstliche Durchlaucht zuvordienen willig stets wollenn werden befunden. /

Datum Heilsberg, den XVII Ianuarii M D XLII.

Ioannes, von Gots gnaden bischoff zu Ermelandt /

qui supra manu propria subscripsit