Reverendissimo in Christo Patri et Domino Ioanni Dei gratia episcopo Varmiensi, fratri et amico carissimo et observando

Reverendissime in Christo Pater et Domine, frater et amice carissime et observande .

Salutem et felicitatem.

Mitto ad Vestram Dominationem Reverendissimam iubilaeum regiae maiestati per omnes diciones ipsius a Sede Apostolica concessum, integrum annum a die publicationis valiturum, ut eum Dominatio Vestra Reverendissima publici notarii manu descriptum et signo suo signatum publicari in dioecesi sua iubeat, constitutis ad hoc certis locis sacris, quemadmodum ego in dioecesibus meis feci. Privatim autem admonebit Dominatio Vestra Reverendissima confessores, ut iniungant hominibus aliquid in capsam sive arcam pro subsidio regiae maiestatis contra infideles et ad munitionem arcium finitimarum imponendum. Faciet in eo Dominatio Vestra Reverendissima officium suum.

Quam diu bene valere et felicem esse cupio.

Cracoviae, XVI-a Martii anno Domini M-o D-o XLI-o.

Vestrae Dominationis Reverendissimae frater Petrus archiepiscopus Gneznensis et Cracoviensis episcopus subscripsit