Reverendissimo in Christo Patri et Domino, domino Ioanni Dei gratia episcopo Varmiensi, domino observatissimo

Reverendissime in Christo Pater et Domine, domine colendissime.

Officiosissimam servitutis meae commendationem.

Qui responsum huc attulit ex Graudentinis comitiis, nullas a Reverendissima Dominatione Vestra mihi litteras attulit. Nihilominus scribam per eum, si quid scriptu dignum occurret, spero enim tandem aliquando absolutum iri. Sed neque domini Costcka nepotem vacuum meis ad Reverendissimam Dominationem Vestram litteris dimittere volui, per quem pacis conditiones inter caesarem et Gallum mitto. Scripseram ex Parczow Reverendissimae Dominationi Vestrae per magistrum Iacobum. Quae litterae num sint illi redditae, nescio. Sed ea scripseram, quae una mecum magister Iacobus audivit ex ore palatini Sandomiriensis, quae tamen falsa fuerunt. Palatinus Masoviae frater reverendissimi domini archiepiscopi mortuus est. In demortui locum suffectus est frater Vladislaviensis episcopi, qui habet in matrimonio sororem domini Soboczki.

Deum precor, ut Reverendissimam Dominationem Vestram diu servet incolumem et felicem. Subsequentur brevi et Napolski, et cubicularius. Per eos plura. Interea me gratiae Reverendissimae Dominationis Vestrae commendo.

Cracovia, quindecimo Calendas Decembres 1544.

Eiusdem Reverendissimae Dominationis Vestrae servitor deditissimus Stanislaus Hosius cantor et canonicus Varmiensis