Dem edln und ernfessten hern Hannsen von Werden, ... hauptman zu Newburg ... [u]nd burgermeister ... [Da]nczke, / unnserm guettn freundt zu hannden

Unnsern freuntlichen grues und alles guetn zuvoran. Edler, ernfester her, gunstiger freundt. /

Wir haben durch unnsern ohem Ewr Herlichkeit schreiben erhalten / und dancken fast vor die newzeÿttung. / Es geet wunderlich zcw. Got fuegs zum pesten etc. Wir wissen dismal von zeytungen nichts sunders zu schreiben. / Wan unnser dienner, / des wir alle tage unns vorsechen, / von Krako / widerumb an unns gelanngt, / was unns dergleichen / und was zu wissen von nottn, / zu wirt kumen, wolle wir Ewr Herlichkeit nicht vorhalten. /

Was unnsern ohem und sein stiffvater, den hern doctor, angeth / und den brifs, den Ewr Herlichkeit zwischen in gethon, sage wir Ewr Herlichkeit dannck / und wollen solhs widerumb beschulden. /

Die geschefft des apts von Lindaw wissen wir noch, wÿ uns noch bey dem hern doctor, der von den fursten vor drey tagen gefurdert, / eyleyndts sich geen Konigsperg begeben, / dor wein ist etc. Hiemit thue wir Ewr Herlichkeit in lanngweriger gesuntheit und gluckseiligen zu nemen Gote dem almechtigen befelen. /

Datum aus unnserm slosse Lobaw, den 25 tage Augusti M D XXXIIII.

Joannes, von Gots gnaden bistoff zu Culmenn und administrator des bysthumb zu Pomesan /