Serenissimae Regiae Maiestati Poloniae etc. [Do]m[ino] et domino meo [c]lementissimo.

Serenissima regia Maiestas, Domine et Domine clementissime. Humillimam perpetuae meae servitutis commendationem .

Superiori die misi ad illustrem ducem in Prussia fratrem meum in quibusdam negotiis vicinitatem nostram spectantibus, qui rediens rettulit mihi dominum ducem bene erga me affectum, id dumtaxat illum aegre ferre, quod in rebus ecclesiasticis et spiritualibus episcopos eius, unum consecratum, habentem uxorem et alium non consecratum etiam uxorium, non recognoscam pro episcopis ecclesiae nostrae conformibus, quod si mihi licet nec ne, non est Serenissimae Maiestati Vestrae incognitum. Nihilominus postulavit a me, ut fratrem eius illustrem et reverendum dominum Vilhelmum Serenissimae Maiestati Vestrae commendarem, qui praeter id, quod coadiutor est Rigensis, Osiliensis etiam nuper est electus. Quem Serenissima Maiestas Vestra iure et necessitudine sanguinis et quantum humillimae meae preces possunt, commendatum quaeso habeat et ea in re gratia Sua prosequatur meique clementer rationem habeat in condonatione contributionis.

De Fasoldo vereor, ne novam nobis in Prussia excitet tragoediam, quandoquidem dominus dux induci non potest, ut in gratiam illum recipiat. Spigel cubicularius Serenissimae Maiestatis aliquamdiu apud me male habuit, non potuit igitur redire citius.

Quod reliquum est, me Serenissimae Maiestati suppliciter commendo. Christus, Dominus noster, det Serenissimae Maiestati Vestrae et istum novum et quam plurimos alios in diutissima salute et prosperitate transigere annum.

Ex castro Lubaviensi, 29 Decembris anno Domini 1533

Serenissimae Maiestatis Vestrae humillimus capellanus et servus Iohannes episcopus Culmensis manu propria