Unsern fruntlichn grues / und was wir liebs und wolgefallens vormugen zuvorann. / Ersame, nhamhafftige hern, gunstige freunde. /
Unser liber vetter, der erbar ⌊Lorencz von Houenn⌋, hot ein rechtshandel mit der frawenn ⌊Lismanyn⌋ von ⌊Thornn⌋, / welche in eyin etlichen korn und anders belangend gedochten unsernn vetter vorkorczet / und in zu trefflichen schaden und unkosten gebrocht / und im abslage des korns dem koff und vortrag nicht genug gethon, / das uns neben unsermm vetternn nicht wenig besverlich. / Und so nun recht und ortel dar uber ergangenn / und durch unsers ⌊vetternn⌋ vorsproch solch orteil an Ewer Erbarkeit gescholtenn und gelanget, / bittenn wir Ewer Erbarkeit, / wie die rechtlibenden / wolten so solch gescholten orteil vor sich nemenn und rechtlich ermessenn, do mit unser ⌊vetter⌋ seines sveren schadenns sich mocht ergetzenn, / ouch inn mit den ersten vorhelffenn, do mit er alle seiner sachen rechtshendel schrifftlich mocht uberkomenn, / des wir uns dan zu Ewer Erbarkeit anzcweifel thun vorsehen / mit erbittung, solchs umb Ewer Erbarkeit, die wir Gote in aller glukseligheit thunn befhelenn, / zu beschulden. /
