Unsernn fruntlichn grus mit alles guttnn erbittung zuvorann. Edler, echrnfester her, gunstiger freundt. /

Ewer Herrlichkeit schreibnn, datum Danczk, V dis monts, / darin der handel zu Graudencz negst gehalten vorczeichent, / hab wir den VIIIten darnoch entfangenn / und ist uns leidt, das disse sache von widerwertigheit der frawenn, / die mit keinem grunde und billigheit vorfurt, / zum ende nicht ist komenn. So nun das recht weiter daruberghen sol, / losse wir uns beduncken, / wirt ir frechmuttigheit entgeldenn. An uns sol nichts abghenn, das der gerechtigheit gemess und uns wol geburen wil etc.

Was das pferd und den hern danczker castellan betrifft, / hab wir euch gernn gefolgt / und im das selbtige / bey seinenn schreiber Hieronimo, / der disse zceit bey uns gewest, / geschickt / etc. So wir hirinne euch nicht habenn mocht unser danckparheit, / vor vil woltath uns bewisen, / etlicher moss entdecken, / so sey wir noch willig disser unser danckparheit, / wer wir die vormugen, / nochzufolgen etc. Das sichs so nicht hot wolt zutragenn, das wir diss mol euch hetten mugen sehen, / muss uff ein ander zceit vorbleibenn. / Dem hern danczker castellan hab ich durch sein schreiber muntlich etwas darvon entworffen, / worummb das wir gern mit euch und im weren zusamne gekomenn / etc.

Vor die newe zceitunge dancke wir euch. / Wir habnn nichts anders, dan das konigliche majestet gesundt von Rudniki zu der Wilden den XVIII Iulii ist eingerittenn, / und das nicht ider mit etc. zufriden ist etc.

Unsers ohms Simons sachen mit seim stifvater halt wir ouch die gestalt, hab mit der wilkore, wie ewer eingelegter zcedel gelaut. / Woltennn ouch gern ir entschafft hetth etc. Hiemit gebe euch Got der almechtig in langweriger gesuntheit und glukseligenn zu nemenn sein gnad.

Datum aus unserm slosse Lobau, den X Augusti 1534.