Nobili et egregio domino, Ioanni Dantisco, nuntio et secretario regio, amico carissimo

Nobili[s] [domi]ne, amice carissime.

Hesterno die rediit ex urbe Roma doctor [B]orgk , litteras tamen et bullas provisionis nostrae de episcopatu Cracov[iensi] secum non attulit, praemiserat enim illas per dominum Iostum, ille ver[o] Barum ex Venetiis reversurus misit illas per Andreolum suum, qui oneratus nonnullis capsis et rebus mercatoriis, venire hactenus huc non potuit, nec sub hac malignitate viae venire cito poterit. Quare mittimus obviam illi hos duos servos nostros, quibus commisimus, ut litteras et bullas nostras ab eo accipiant et ad nos quam celerrime afferant. Rogamus vos litteras praesentibus annexas reddatis domino Iosto et domino secretario me ex animo commendetis. Bene valete.

Datae Cracoviae, Sabbato proximo ante Dominicam Palmarum anno Domini M-o D-o XXIIII-o.

Petrus episcopus Posnaniensis et vicecancellarius subscripsit