Dem durchlauchten, hochgebornen fursten unnd herrn, hern Albrechten, von Gots gnaden marggraf zw Brandenburg, / in Preussen, / zu Stettin, Pomern, / der Cassuben und Wenden hertzog, / burggraff zw Normberg und furst zu Rugen, / unserm hochgunstigen, lieben hern und freund

Durchlauchter, hochgeborner furst, / hochgunstiger, lieber herr unnd freundt. / Unsere freuntliche und vleiswillige dinste zuvoran.

Dieweil wir zu Soldaw, / wie wir hetten vorhofft, / Ewer Furstliche Durchlaucht nicht betroffen, / underwegens auch bisher / von wegen unser mueden schwacheit / nicht haben mugen erwarten, / hab wir dennoch nicht underlassen wollen, / Ewer Furstliche Durchlaucht mit diesem unserm schreiben zwbesuchen / mit anczeigung, / das wir fast erfrewt sein / von wegen Ewer Furstlichen Durchlaucht gluckseligen / und in gutter gesuntheit ( wie wir vornomen ) heimzcoge. / Der almechtige wolde die darinnen zu langen zeiten / in aller wolfart und seligheit erhalten. / Mit uns ists ( Gott hab lob, / ehre / und alle dancksagung ) vil besser, / dan wie uns Ewer Furstliche Durchlaucht zu Krako im leger gesehen, / in unser gesuntheit worden, / allein, / das wir noch nicht wenig schwerheit in unsern glidern, / do die whetage gewesen, / befinden, / furderlich / uf bösem wege / wurtzeln und steinen / im wagen zuschuttelt, / derhalben wir auch hie haben mussen bleiben / und vorzihen, / bis das wir etwan stercker / uns uf den weg widerumb mügen begeben, / hirumb wir Ewer Furstliche Durchlaucht mit hohem vleis bitten, / uns freuntlich wolde zu gutt halten, / das wir die zu Heilsberg, / wie wir gerne hetten gewolt, / nicht haben mocht entfangen, / und noch unserm armut ehren und tractirn. / Wolde auch so vor gutt nhemen / noch gelegenheit der zeitt, / was das haus hott, / und den gutten willen gleich den wercken lassen gelten. / Thun uns auch hiemit in Ewer Furstlichen Durchlaucht alte gunst und zuneigung zw uns freuntlich und vortrawlich befelhen. /

Datum Wartenberg, denn XVIII Junii M D XLIII.

Ioannes, vonn Gotts gnadenn bischoff zw Ermelanndt

qui supra manu propria subscripsit