Dem Hochwirdigen Fursten und Herrn / hern Johannsen bischofen zu Culmenn konigilicher maiestät zu Polen potschaffter, meinem genedigen herrn

Hochwirdiger Furst, genediger herr. /

Ewrn Furstlich Gnaden seyen mein underthanig willig diennst zuvoran berait.

Ewr Furstlich Gnaden schreyben, mir gethan des datum stet XXVII Ianuarii hab ich empfangen unnd alles innhalts vernomen. / Erstlich, so hab ich von herrn Quirino Galler noch kein beschaid seins aufgebens halb / Ewr Furstlich Gnaden betreffend / empfangen. / Sobald ich aber solche von ime in schrifft bericht wurde, wie ich indem deshalb geschrieben hab, / so will ich solchs Ewr Furstlich Gnaden wissen lassen. / Den puntlbrueff(!) hab ich Jorigen Hegel gen Kraca gesandt. /

Das ihenig, so von dem gross cantzler gemacht und Ewr Gnaden mir schickht, / ist mir nit worden. / Ich acht sey im zumachendes briefs vergessen worden. / Das wolt ich Ewrn Gnaden, dero ich dienstlichen willen zu ertzaigen gantz willig bin, / gutter meinung nit verhallten. / Thue mich hiemit Ewrn Gnaden bevelhen. /

Datum Augspurg, den VII tag des monats Februarii anno etc. XXXII.

Ewr Furstlich Gnaden underthaniger Antoni Fugger subscripsit