Reverendissimo in Christo patri et domino Ioanni Dei gratia episcopo Culmensi amico carissimo et honorando

Reverendissime in Christo pater, domine et frater carissime et honorande.

Declaravit mihi dominus Alexander Sculteti legationem suam et obtulit litteras capituli Varmiensis ad maiestatem regiam petens, ut missis ad maiestatem regiam litteris negotium electionis apud suam maiestatem iuxta desiderium capituli precibus meis adiuvarem. Contuli nonnulla cum homine indicans regiam maiestatem non facile admissuram, quod relicto priori instituto de promovendo coadiutoriae iure, quod fuit ob spem successionis tam a se, quam a capitulo approbatum, eorum desiderio parens dissidio et difficultati alicui fenestram aperire debeat. Nam quod causantur summum pontificem non esse confirmaturum coadiutoriam, respondi non opus esse iam coadiutore, sed successore, quem regia [maiest]as designavit et capitulum elegit. Sed post istas co[n]certationes, in quibus videbar mihi superior esse, nam rationibus per me adductis non potuit dominus Alexander sufficienter respondere, obtuli me missurum litteras capituli et petitionem nuntii descripturum esse regiae maiestati. Quod et feci atque scripsi eo tenore, quem habet exemplum praesentibus adiunctum. Nam litterae capituli tale responsum videbantur postulare.

De litteris ad summum pontificem post acceptum a capitulo Varmiensi de postulatione responsum curabitur a me diligenter, ut reliqua. Nunc enim acceleratione opus esse non putabam neque etiam permiserunt occupationes cum nuntiis Romanorum regis et Valachis, in quibus absolvendis tum in scribendis ad maiestatem regiam litteris non parum temporis insumendum erat. Addit curarum nonnihil, quod praeter spem accidit ex tractatibus et tanto labore nostro nihil, nisi bellum etc. Postulant quidem magnis precibus utrique isti nuntii, ut fiat armorum suspensio ad aliquantum tempus per indutias, quas Valachi nomine heri sui petituri sunt a maiestate regia, si admittere voluerit. Plura in praesens non vacat.

Opto, ut Dominatio Vestra Reverendissima feliciter valeat et me amet.

Cracoviae, VI Augusti MDXXXV[I]I.

Vestrae Dominationis Reverendissimae frater Ioannes nominatus Cracoviensis, regni Poloniae cancellarius scripsit