Durchlauchter, hochgeborner furst, hochgunstiger, lieber her und freundt. / Unsere freuntliche und vleis willige dinste zuvoran. /

Nach Ewer Furstlichen Durchlaucht cantzler unnd rath des edlen, ernvhesten und hochgelerten hern Johansenn von Creitzen doctor / abschiedt negst von uns / ist der achtbar und wolgelert magister Johan Lomullerr, / Ewer Furstlichen Durchlaucht rath, an uns gelangt, / den wir von wegen alter kuntschafft etliche tage bei uns vorzogen, / und auch ab sich was mitler zeit zutruge aus unsers orts zu Graudentz gehaltner tagfart, / das Ewer Furstlichen Durchlaucht zuwissen fueglich, / so seint uns etliche zeytung worden, / die welche wir mit im beredt und mitgegeben, / an Ewer Furstliche Durchlaucht zubringen, / freuntlich bittend, ab dergleichen was bessers ader gewissers an Euere Furstliche Durchlaucht zukommen, / uns mit zuteilen, / solchs wir umb Ewer Furstliche Durchlaucht, die wir gotlichen gnaden in langweriger gesuntheit / und aller glugseliger wolfart / bevelhen, / gerne wollen beschulden / unnd freuntlich vordienen. /

Datum Heilsberg, XI Octobris M D XLI.

Ioannes, von Gots gnaden bischoff zu Ermelandt. /

Qui supra manu propria subscripsit