Dem durchlauchten, hochgebornen fursten und herren, herren Albrechten, von [Gots] [gna]den marggraff zu Branden[burg /], [in] [P]reussen, / zu Stettin, / Pom[mern], [der] Cassuben und Wenden hertzog, [burggraf] zu Normberg und furst [zu] [Rugen], unserm hochgunstigenn, [liebenn] [h]eren unnd freundt

Durchlauchterr, hochgebornerr furst, / hochgunstigerr, vilgeliebterr herr und freundt. / Mein freuntlich unnd gancz vleiswillige dienste zuvorann. /

Gestriges tags hab ich Ewer Furstlichen Durchlaucht eingenhantschreiben entfangenn, do nebenn die brive in vorgenomenen sachenn an meinn altenn hoffbruderr, denn Nibschicz, / welche ich mit andrenn meinenn morgenn frwe im wil zuschickenn, / zu Gote hoffende, das sie mit meynemm botenn wol und gewislich sollenn zwstelle komenn. / Mein schreibenn sol ouch, / wie ich imm negstenn gemelt, / an die II hern etc. ausghenn etc.

Vor das freuntlich entpittenn / der durchlauchten, hochgebornen Ewer Furstlichen Durchlaucht furstin und herczog Hansenn thue ich mich gen ire furstliche durchlaucht beyde uffs hochst bedanckenn / und bleib im vorigenn wunschenn, Goth den hochstenn bittende, Ewer und ire furstliche durchlauchten in seiner gnadenn / vor allemm argen, / und das seele unnd leib widrig ist, zu behuttenn und bewarenn, / und thue mich hiemit in Ewer Furstlichen Durchlaucht grosse und erkante gunst mith hochem vleis vortraulich befelenn, / der ich mich mit al meynemm vormugenn genczlich in aller freuntlicherr zuvorsicht / ergebe willig und gehorsamm.

Datum Heilsberg, XXII Februarii M D XL.

Ewer Furstlichen Durchlaucht willigerr

Ioannes, etc. bischoff zu Ermeland etc. manu propria etc.