GStA PK, HBA, C1, No. 936, f. 3v

Dem durchlauchten, hochgebornen fursten unnd herrn, hern Albrechten, von Gots gnaden marggraff zu Brandenburg, in Preussen, / zu Stetin, / Pomern, / der Cassubenn und Wenden hertzog, / burggraf zu Normberg und furst zu Ruegen, unserm hochgunstig(en), lieb(en) hern und freund

GStA PK, HBA, C1, No. 936, f. 1r

Durchlauchter, hochgeborner furst, / hochgunstiger, lieber herr unnd freundt. / Unsere freuntliche und vleiswillige dinst zuvoran.

Uns ist bei diesem bothenn E(uer) F(urstlichen) D(urchlauch)t freuntlich shreibenn / mit den beigelegten zeittungen zukomenn, / unnd thun uns der freuntlicheit und gunst ghen uns in solcher zushickung / mit höhem vleis ghen E(uer) F(urstliche) D(urchlaucht)e bedanckenn, / sein auch gleich der mheinung unnd willens gewest, / durch eigenen bothen diese hie eingeshlossene zeittungen, / die uns gesterigs thags von ko(nigliche)m hove gewordenn, / an E(uer) F(urstliche) D(urchlauch)t zufertigenn, / were dieser bothe nicht vorkomen, / aus welchenn E(uer) F(urstliche) D(urchlauch)t vorstehen wirt, / wie es mit dem reichsthage der Cron wirt vorgenhomen. / Die zeit ist fast kurtz / und die luft ungewiss / etc. Es wirt uns auch noch zugeshriebenn, / das Thorn gefellig zur stelle werde bedacht, / welche den hern der Cron nicht fast geleg(en) etc.

Was wir derwegen und anders, / das E(uer) F(urstlichen) D(urchlauch)t zw wissenn wirdig, / zw wirt komenn, / wolle wir derselbtenn mit denn erstenn nicht vorhaltenn, / dann E(uer) F(urstlichen) D(urchlauch)t, derer gunst wir uns befelhenn, / wilferig zwseinn unnd freuntlich zwdienenn, / wollen wir allwege unvordrossenn werden gefundenn.

Dat(um) Schmalein, / den XXIII Octobris M D XLIII.

Ioannes, vonn Gots gnaden bischoff zw Ermelandt