Dem Hochwirdigen in Gott Furstenn unn[d] Hern, / hernn Ioanni von Gotts gnaden des loblichen stichts Ermelanndt bissho[ve], unnsern gnedigenn hernn

Hochwirdiger in Gott Furst, Gnediger Herr. /

Unsere bereitwillige und gantz geflissene dienste / seint Ewer Hochwirdigste Gnade in allewege bevoran mit fleis entpholen.

Hochwirdiger in Gott Furst, Gnediger Herr. /

Ewer Hochwirdigste Gnade brieff / auf derselbigen schlosse Heilsperck / den XIX Augusti yungst vorshinen ausgegangenn / haben wyr gebuerlichen wirden entfangenn / und dorauss, / das Ewer Hochwirdigste Gnade des armen mesnhen czugesante bekentnissz yn gnaden aufgenommen / vorstandenn, / welche wyr / auff Ewer Hochwirdigste Gnade yungst czu Marienburck gnedige begier. / So an unser raths geliebte freunde unnd vorwantte gelannget vortrawlicher mehnunge czugeshriebenn, dan wyr denselbigen menshen / dermoszen noch verhaftet bey uns vorwarenn und behaltenn lossen, / ab noch wirt der czeit ichsten der worheit gemehs ausbrechen mochte. / Domit kunftigen sheden und furnemen czuvor moge gekommen werdenn etc.

Was aber die gnedige vorbitt / vor ihrenn vorwanntten Heinrich Hofman von wegen des ampts des bawmes belanget / konnen wyr Ewer Hochwirdigste Gnade dinstlichen nicht bergen, / das wyr czu der czeit / wen sulche sachen in raths vorsammelunge vorgenommen / und noch gelegenheit derselbigenn berathshlaget werdenn / Ewer Hochwirdigste Gnade gnedigen ansynnen ingedenck sein wollenn / hirmit thuenn wyr Ewer Hochwirdigste Gnade Gote dem almechtigen czu lange vorhaften tagen gesunt unnd selicklich entphelenn.

Datum Dantzick, dingstags XXVI Augusti anno etc. XLIIII.

Ewer Hochwirdigste Gnaden dinstwillige und geflissene burgermeistere und rathmanne koniglicher stadt Dantzick