Dem Hochwirdigen Fursten und Herrn, herrn Johan bischoven zu Ermeland / auf Heylsperg in Preussen, / meinem gnedigen herrn

Hochwirdiger Furst, Genediger Herr. /

Ewer Furstlich Gnaden sein mein underthanig willig dienst alltzeit zuvoran beraidt.

Ewer Furstlich Gnaden schreyben des datum ainundzweyntzig april in Heylsberg hab ich mit dem veslin wiltins ol, so Ewer Furstlich Gnaden meinem diener Jorgen Hegel gen Croca gesandt / und er mir von dannen alher geschickt, empfangen. / Sag derselben Ewer Furstlich Gnaden underthenigen danck / mit erbietung solches und Ewer Furstlich Gnaden underthanig zuverdienen. /

Den buntel brief von Ewer Furstlich Gnaden an meinen gnedigen hern episcopum Lundensem lautend, / hette ich seiner furstlich gnaden zugeschickt, dieweyl aber sein furstlich gnaden auf sechtzehen praeteriti / von Brussel per Ispania zu kayserlicher majestät postirt, / und iner vier oder funf wuchen gewislich widerum hieaussen sein soll, / hab ich dieselben bey meinen handen behalten. / Dan ich besorgt, dieselben möchten hochgemeltte Lundensem nit unterwegs antreffen / und sich die sach mit der weranthwurtung mindeste lenger verziehen. So bald aber sein furstlich gnaden heraus kompt, / sollen die derselben on verzug zugestellt werden. /

Daß aller weld ich Ewer Furstlich Gnaden auf derselben schreiben underthaniger meinung nit verhalte. / Thue mich hiemit Ewer Furstlich Gnaden underthanig bevelchen.

Datum Augspurg, den andern tag Iunii anno etc. XXXIX-ten.

Ewer Furstlich Gnaden unterdeniger Antoni Fugger subscripsit