Unsern fruntlichnn grues mit aller seligheitt wunschung zuvoran. / Grosmechtiger her, gunstiger freundt. /

Gestrigs tags ist unser bot von Krako widerkomenn, / der dissen beygelegten briff an Ewer Herlichkeit mit sich gebracht. / In der dennischen sachen schreibt uns konigliche majestet, unser allergnedigster her, / das ir majestet die selbtige meynung wie Ewer Herlichkeit nebenn andrenn hern / durch uns schrifftlich hot lossen antragen, / romischer koniglicher majestet durch den hochwirdigenn hern von Camenecz hot befolen anzuzeigen, / und ouch der wegenn kayserlicher majestet geschribenn. / So von der antwurt wider kompt und konigliche majestet erkennen wirt von noten zu sein, / wil ir majestet ouch ein botschafft hinfertigenn etc. Was unser tagfart angeht, / wirt Ewer Herlichkeit aus koniglichem brive haben zuvornemenn. / Sonst ist bey hove nichts newes, dan das die hernn der Kron teglich gen Krako zu zcyhen / und konigliche majestet in irer kranheit der fussenn, / Got hab lob, / besserung entfurt. / Dem wir Ewer Herlichkeit mit al den iren in langweriger gesuntheit unnd glukseligemm zu nemenn befelenn. /

Datum aus Heilsberg, den XVIII Ianuarii MD XL.