Denn ersamenn und namhafftenn hern burgermeister und rathmannen der konigklichenn [stadt Da]ncke, meynnen gunst[igenn f]reundenn /

Freuntlichenn grus unnd was ich liebs unnd guts vormag zcuvorann.

Namhafftige hernn unnd gunstige freunde.

Was ich zcw Marienburgk mit Eur Erbarkeit gesentenn gereth unnd mich erbottenn habe, / ist, wie ich mich vorsehe, Ewr Erbarkeit angetragenn, / unnd bleibe fest unnd stet uff der selbigenn meynunge, / will auch nicht anders gefunden werdenn, / vorhoffe der gleichenn viel liebs unnd guts vonn Eur Erbarkeit unnd bitt hirumb Ewr Erbarkeit, wie ich auch die gesenttenn gebettenn, / woltt vorschaffenn, das der armen witwen Merten Haseschenn, / die lange czeit in irer gerechtikeit vorczogenn, / donebenn auch Bartolome Senger, meym schwoger, / recht geschee / zcw seinem vetterlichem unnd mutterlichem antheill, / das ime Jorge Angermundt wider alle billikait vorheldt, / auch das mein pfarkirch mith denn capellanenn durch denn commendarium, denn Ewr Erbarkeit gesecht, / biss zcw meynner zcwkunfft mocht cristlich unnd wie bisher mit speisung erhaltenn werden. /

Hirinnen / hoffe ich, Eur Erbarkeit werdenn sich kegen Got dem allemechtigen dinstlich / unnd mir neben euch zcw nucz unnd ehrenn / fruntlich wissenn zcwhalten, / das ich allewege zcwbeschuldenn und vorgleichen umb Eur Erbarkeit will sein geflissenn. /

Datum zcw der Lobenn, 15 / Octobris 1532. /

Ioannes bischoff zu Culmen manu propria