Den ersamen und namhafftigen herren burgermeister und radtman der koniglichenn stadt Dantzig, unsernn besondern, guthen freunden.

Unsern freuntlichen grus und alles guttes zuvoran. Ersame, namhaftige, besondere, guthe freunde. /

Unsere underthan, die ersamen des rats unser stadt Braunsberg, haben uns undertheniglich angezeigt das jenige, so Ewer Erbarkeit durch die ersamen vom Elbing der ansehischen hendeln und botschaft halben an kayserliche maiestet von in furdern. Dieweil wirs aber nicht fast der billigheit gemess achten, das die unsern so vil sollen zulegen, also die vom Elbing, / und sie ym vorgangen kriege zu grossem schaden kommen des vormogens nicht sein, / ist an Ewer Erbarkeit wie die heubter der ansehe dis orts unser freuntlich bitt, wolten dis mal der unsern vorschonen und sie mit solchem furdern, wie die geringsten ubersehen, domit sie vordan in der [a]nsehe gesulschafft mugen bleiben, welchs wir umb Ewer Erbarkeit in eim grossern gerne wollen beschulden. / Gote bevolhen.

Datum aus unserm schlos Heilsberg, den funften Decembris M D XL.

Joannes, von Gots gnaden bischoff zu Ermelandt