Denn ersamenn unnd namhafftigenn hern burgermeister unnd rathmann der koniglichen stadt Danntzigk, unnserenn besunnderen, guttenn freundenn

Unnserenn freuntlichenn grus unnd alles gutts zuvorann. Ersame, namhafftige hernn, besundere, gutte freunde. /

Unns ist Ewer Erbarkeit schreibenn nebenn koniglicher maiestet, unsers allergnedigstenn herrenn, vorschlossnem brieve, / an die herrenn rethe diesser lannde gestelt, / gestrigs thags gewordenn, / des wir hie Ewer Erbarkeit, wie die vonn uns gebethenn, / eine abschrifft eingelegt, / zuschickenn, / die wir auch vordan an die grosmechtigen herrenn culmischenn und marienburgischenn woywodenn / durch denn edlenn, wolgebornnen hernn elbingschenn castellann, schatzmeister etc. unnd an andere herrenn castellan unnd unnderkemerer vorordent habenn, / dergleichenn durch die ersamen vom Elbinge / ann die ersamenn zu Thornn auch habenn gefertigt. / Dieweil unns aber seine lieb, der hochwirdige herr bisschoff zu Culmesehe, nicht gelegenn, / auch sich mit gebreuchlicher freuntlicheit unnd schreibenn an unns thut ennthaldenn, / damit sein lieb dannoch mocht wissenn, / was konigliche maiestet, unnser allergnedigster herre, auf der herrenn rethe aus negster thagfart zw Graudentz vorschrifft unnd commendacionn inn der putzker sache geantwurt, / ist unnser freuntlichess synnen, / seiner lieb solche abschrifft woltenn zusennden, / das die weitter ann denn grosmechtigen hern pomerellischenn woywoden vonn der Löbe, / die nicht weit gelegenn, / mochte gelangenn. / Denn brieff wolle wir inn das negste der hern rethe zusamne komenn mitbrengenn. / Solchs alles hab wir Ewer Erbarkeit, die wir gottlichenn gnadenn bevelhenn, / freuntlicher weis / nicht wollenn unangezeigt lassen. /

Datum aus unserem schloss Heilsbergk, den IX Decembris M D XLIIII.

Joannes, vonn Gottes gnadenn bisschoff tzw Ermelanndt