Unnserenn freuntlichenn grues unnd alles guts zuvorann. / Ersame, namhafftige herrn, besundere, gutte freunde etc.

Wir habenn Euer Erbarkeit bericht / auff unnser schreibenn unnd bitte vonn der antzall der brüder, so inn der Carthaus gewesenn / unnd wie man sunst mit demselbenn closter gehandelt, / erhaltenn, / wo zu wir auch Euer Erbarkeit das mhal des herren lesslawschenn bisschoves antworts abschrift zugefertigt habenn, / das dieselbtenn sich desto weiter inn den sachenn erkundigenn thetenn, / unnd were davor der freunthlichenn dancksagung unnötig, / die doch der gestalt vonn unns ist aufgenhomen wordenn, / das wir ferner Euer Erbarkeit vil zugethanes willens zuertzeigenn erbottig sein. / Habenn auch nicht nachgelassenn / solche newheit / und wider unsere gemeine priuilegia einfelle / beide ann die alte unnd junge konigliche maiestet mit unserenn eigenenn geschicktenn bothenn zuschreibenn. / Was unns wider durch die wirt zukomenn, / wollenn wir alsdann Euer Erbarkeit, / die wir götlichenn gnadenn bevelhenn / nicht vorhaltenn. /

Datum aus unserem schlos Heilsberg, denn XII Nouembris M D XLVI.

Joannes, vonn Gottes gnadenn bisschoff tzw Ermelanndt