Dem Erwirdigenn ihnn Goth unserm besonndernn liebenn Freundt unnd Nachparnn, herrenn Johannsenn bischoffen zu Ermelandt

Unnsere freuntliche dinst zuvornn. /

Erwirdiger ihn Got, besonder lieber Freundt unnd Nachpar.

Wir habenn Euer Lieb schreybenn, / darinnen dieselb den tagk zu besÿchtigung des mulpaues, welchenn der erenvhest unnser obermarschalch rathe unnd lieber getreuer Friderich von der Olsnicz etc. auffgericht, denn 26. Aprilis ernennen, verstandenn. / Damit nun dieser handel einmals zu guther entschafft gelangenn moge, / wollenn wir unsere com <m> issarios auff denn angesacztenn tag / gernn daselbst hin zur stelle, / vormittels gotlicher hilff handlung zupflegenn unnd gewarthenn, / abfertigenn. / Wir habenn auch als palt bemelthen unnserm marschchalch denn tagk / mit diesem ahnhang, / das ehr mit demselbenn seÿnen paw, / auff das nichts doran geenderth, stille stehenn sol bevohenn, / vormeldet / vorsehenlich weÿl ehr uns, / das seÿns wissens dis jhar dorahnn nichts gepaueth, / bericht / demselbenn, / des ehr sych auch erpothenn also nachkommen werde, / dis habenn wir Euer Lieb, die wir hiemit dem liebenn Got bevelhenn, auff ihr schreybenn zur antwurth nicht vorhaltenn wollenn. /

Datum Konigspergk, den 30-n Martii anno 1541.

Vonn Gots gnaden Albrecht marggraff zu Brandenburgk, ihn Preussen, zu Stettin, Pomern, / der Cassubenn / unnd Wendenn / hertzogk, / burggraff zu Nurembergk und furst zu Rugenn etc.

Cancellarius scripsit