» Korpus Tekstów i Korespondencji Jana Dantyszka
Copyright © Pracownia Edytorstwa Źródeł i Humanistyki Cyfrowej AL UW

Wszelkie prawa zastrzeżone. Zabrania się kopiowania, redystrybucji, publikowania, rozpowszechniania, udostępniania czy wykorzystywania w inny sposób całości lub części danych zawartych na stronie Pracowni bez pisemnej zgody właściciela praw.

List #5199

Ioannes DANTISCUS do Albrecht I von Hohenzollern-Ansbach
Heilsberg (Lidzbark Warmiński), 1538-07-31


Rękopiśmienne podstawy źródłowe:
1czystopis język: niemiecki, ręką pisarza, GStA PK, XX. HA Hist. StA Königsberg, HBA, C 1, Nr 515
2regest z ekscerptami język: niemiecki, polski, XX w., B. PAU-PAN, 8243 (TK 5), a.1538, k. 41-42

Pomocnicze podstawy źródłowe:
1regest język: niemiecki, GStA PK, XX. HA Hist. StA Königsberg, Ostpr. Fol., 14 320, k. 28v

Publikacje:
1HARTMANN 1525-1550 Nr 515, s. 288 (niemiecki regest)

 

Tekst + aparat krytyczny + komentarzZwykły tekstTekst + komentarzTekst + aparat krytyczny

 

Dem durchlauchten, hochgebornen fursten und hern, her Albrechten, von Gots gnaden marggraff zu Brandenburg, / in Preussen, zu Stetin, Pomern, der Cassuben und Wenden hertzog, burggraff zu Normberg / und furst zu Rugenn, unserm hochgunstigem, lyben hernnn und freundt

Durchlauchter, hochgeborner furst, hochgunstiger, lyber her und freundt. / Unsere freuntliche, willige dinst zuvoran. /

Wir haben den negst vorschinnen abent Ewer Furstlichen Durchlaucht schreÿben von ÿrem / und kurtz zuvor von unserm dynerr, das vorige von Hollandt entpfangen, / in welchen wir Ewer Furstlichen Durchlaucht besondere gunst und lieb gen uns klerlich thun spurenn / in dem, das Ewer Furstliche Durchlaucht so freuntlich mit vil guts wunschung unser ankunfft angenhomenn, dovor wir der selbten Ewer Furstliche Durchlaucht mit allem fleis dancken, / und ÿst unnot, / das sych Ewer Durchlaucht gen uns danckbar bewÿsen, / so wir das gethan, / wÿ wir schuldig / und wÿ uns von koniglicher maiestet, unserm allergnedigsten hern, / mit romischer koniglicher maiestet zu handlen befolhen, / dorin wir nichts nachgelassen, / unser muglicheit noch, / das wir unser aller sachen zu gute thuglich haben vormerket, / und ÿst nicht, / wÿ wir zuvor geschrÿben, / wer umb sich Ewer Furstlichen Durchlaucht fast soldt bekomern. / Wer der gleichen was, / sold Ewer Furstliche Durchlaucht, / wÿ wir der trewhertzig zu gethan, / nicht pleÿben vorhalten etc.

Das wir aber angetzeÿgt, / ein freuntlich uffsehennn nicht schedlich etc. ist nicht derhalben, / das sich Ewer Furstliche Durchlaucht etwas soldt sweres befharenn, / welchs wir mit guther warheit / in aller handlung und sunst auch nindert befunden, / allein, / wÿ wir gut wÿssenn tragen, / derwegen, / das, wÿ sunst Ewer Furstliche Durchlaucht im reich und allenthalben gewisse kuntschafft hatt, / von solcher, / wÿ gesprochen wirdt, / in omnem eventum nicht abstunde. / Es kan keynnem ding so wol zu gesehen werdennn, / das dy ubermass nicht nutzlich mocht sein, / ÿst auch an schaden / ubrige vorsichticheit zu haltenn, / so doch kein ubrige, / unsers bedunckens, / geseÿn mag. / Es begibt sich auch, / das zwischen freunden uffsehen kein schaden bringt, vÿlwÿnniger ÿst... zu dÿsen tzeÿthen schedlich, / das wir abermals nicht dohin schreÿben, / das was seÿ, / dovor sich hott Ewer Furstliche Durchlaucht zubesorgen, / wÿ wir dan auch ( das wir mit Gotte zewgennn ) / nichts solchs wÿssennn, / allein guther wÿss / und in dysen geloufften, / wÿ im sprichwortt ÿst, / uffsehen nicht schadet etc.

Wer wir hie gewest, / do Ewer Furstliche Durchlaucht zu Bartsteinnn negst eintzog, / het wir nicht mugen nachlassen dÿselbte, / dÿ wir gern in guther gesuntheÿtt / und in reichen gotlichen gnaden wolthen sehen, / zu besuchen, / weren auch dÿsmal unbeswert / uff Ewer Furstliche Durchlaucht furdren / zu der uns uff angesetzte zceit zubegeben, / so uns nicht notliche sachenn unsers standes wern vorgefallen, / nemlich dass uns nicht lengst vorgangen den XXII dits / unser expedicion und bullen von Rom / noch langen warthen / sein zu komen, / mit welchen wir den besÿtz und pflicht unser underthan dyse thage eintzunemen gesinnet / und unsern auszog von hinnen den XVI dis eingenden monts vortzustellenn, / darÿnnen das fest sant Bartholomei zur Frawenburg beÿ unser kirchen zu halthen, / das wir der gestaldt unvorleglich unserm wirdigen capittel haben zu geschrÿben, / und alles dartzu, wÿ der gebrauch, / ÿst gericht, / hirumb uns nicht wÿl bekwem sein, / das wir, / wÿ wir gern wolten, / Ewer Furstliche Durchlaucht freuntlich und gunstig wirtschafft laden / mochten nachkomen. / So kompt auch balde darnach unser hie im land thagfarth uff sant Michels feÿer. / Auss solchen und andren ursachenn, / dy uns theglich zu wachssen, / muge wir noch nicht Ewer Furstliche Durchlaucht freuntlichen wÿllen / und unserm stadtlichen beger genug thun, / vorhoffen aber, es werde Gott, / so sein barmhertzigkeÿt uns so lang im leben lest, / dy zeÿt schicken, / das wir uff slÿthen Ewer Furstliche Durchlaucht und der selbten lybe furstin, unser hochgunstige beichtthochter, / ane beswer mugen besuchen, / dÿ wir freuntdinstlich von unsernn wegen bytten zu grussennn / und uns in Ewer Furstliche Durchlaucht gunst thun befelhen. /

Datum Heilsberg, den letzten thag Iulii MDXXXVIII.

Ioannes, von Gots gnadennn byschoff zu Ermelandt qui supra manu subscripsit